مقطوعات زجلية
رابح التيجاني
لاعين بكات ولا قلب وجع
رابح التيجاني
لاش الآهــــات وعيوني تدمــــع
الحب يلا فـــات ما تلا يرجــــع
وانا فلحيــــاة ما بقالي طمــــع
مشات ولا جــات الملهوف قنـــــع
ولا عين بكـــات ولا قلب وجــــع
لله يا لبنــــات يلا الرجا ينفــــع
قولولها راه مــات ومن لموت شبــــع
هداتو لكيـــات مارتاحلو مضجـــع
وشمــوعي ذبلات ولا نجمة تلمــــع
ولا عين بكــات ولا قلب وجــــع
الروح عيـــات وقلبــــي موزع
هي الذكريــات موسيقى تنبــــع
نغمة نغمـــات تحكيلي ونسمـــع
تقولي بلغــوات يالاه ترجــــع
أو زيـد خطوات وافرح وتمتــــع
ولا عين بكــات ولا قلب وجــــع
( مقطوعة زجلية لحنها الأستاذ محمد الصادق الزاهر وأدتها المغنية رشيدة عبد الرحمان)
دقات قلبي
رابح التيجاني
دقات فلبي اليوم غريـبة
غادي وحدو فطريق مجهول
سرقاتو مني عيون صعيبة
بغا يديني وما قدرش يقول
وطاوي لجناح يـا قلبي على عذابك
كاتم ما بيك وصابر على ما صابك
تابع لحب اللي داك وما جــابك
هربان مني واش لهروب مكتابك
حتى لاين والأوهام سابقة ركـابك
عييت ما نسال أنا ونستنى جوابك
ارجع ليا يعز عليا تنسى حبـابك
وتهيم وتخليني دقات على بــابك
دقات فلبي اليوم غريـبة
غادي وحدو فطريق مجهول
سرقاتو مني عيون صعيبة
بغا يديني وما قدرش يقول
صدقني يا قلبي أنا ما قادر على حسرة
النار طفــات وانت فرمادها جمرة
ماشي ساهل هكذا تدينا ثاني نظرة
جرح جديد على جرح ما زال ما برا
لكن أنت غلبتيني وما بقات ليا قدرة
خذني نجربو ثاني نغـامرو هاد لمرة
( مقطوعة زجلية لحنها الفنان فؤاد الشعري وغنتها المطربة ليلى فرح )
مراكب الموت
رابح التيجاني
ركب لمواج وعــانق الموت
هجر حبــابو ونسى لخوت
غواتو لحلام ونسج بيــوت
بأوهام وخيـوط العنكبــوت
ختار لغربة وشراها ساروت
لرحلة صعبة فقلب تابـــوت
سخا بالتربة وعاش فكذبة
ملكاتو رغبة فذهب وياقــوت
سافر بالليل ورا المستحيل
لا عنوان لا دليل جالس مكبوت
والمركب يميل بقليب عليل
دقاتو عويل يبكي بلا صــوت
صبرو قليل والظلام ثقيل
والوقت طويل والجو مزمــوت
لعقل هبال ولجسم ذبال
لباسو خيال وأوراق التـــوت
الله على حال وتيه الأجيال
تعبد المــال صنم منحـــوت
تقاسي لهوال تابعة لمحـال
وف الرضا مجال والشدة تفــوت
ولما المشتاق من همو فـاق
كان المسكين غراق مشمـــوت
قانط مضياق حارق لوراق
غاص فلعماق هدية للحـــوت
أشنو لي داك لبحور الهلاك
ولخير حداك يا طالب لقـــوت
قطرا ن وطانك أحلى فلسانك
من عسل جيرانك وكنوز هاروت
(مقطوعة زجلية مقبولة من لدن لجنة الكلمات بالإذاعة المغربية
لحنها الأستاذ محمد الأشراقي )
حنين الروح
رابح التيجاني
طاوعت قلبي مرة
وما نطاوعوشي ثاني ،
كانت تجربة مرة
رهقني بيها وعياني ،
آمنت بالحب قدرة
نور لوجداني
وراحة لكياني ،
آمنت بيه فكرة
معناها فوق المعاني ،
جلال وانشراح وبشرى
ونعيم وأفراح وأماني ،،
وسرقاتني من حيرتي نظرة
وجمال بأسرارو خذاني ،
قلت نصارحو فمرة
علاش نداري ونعاني ،
لكن كانت غلطة كبرى
معاها بدات أحزاني ،
كان عليا نتلهى ونلعب
ونخفي عواطف وحنين القلب
بحال يلا كان معنى الحب
خداع مدروس وحساب صعب
مجرد كذوب
بين محب ومحبوب
بين غالب ومغلوب ،
لاش اعتزازي بيه
ونشوف السعادة فعينيه
يلا كان حبي ليه
فرصة عندو للتيه ،
فرصة للتيهان والدلال
واستغلال سحرو والجمال
وتأثيرو عليا
وتعذيبو ليا
تارة يقرب يهيج البال
وتارة يهرب كلوهم والمحال ،
يخليني فحبي تالف
بين الحقيقة والخيال
بين الممنوع والحلال
بين الهجران والوصال
بين المعقول والهبال
يخليني فحبي خايف
من الحب والجمال ،
من أحلامي والحسرة
والشوق يلهب نيراني
وطاوعت قلبي مرة
ما نطاوعوشي ثاني
طاوعت قلبي مرة
ما نطاوعوشي ثاني .
(مقطوعة زجلية مقبولة من لدن لجنة الكلمات بالإذاعة المغربية )
سمع قلبك
رابح التيجاني
شحال ما علات العين
ما تعلا على الحاجب
بــان الحق واليقين
والظلم ولى هـارب
بقدر ما كنت معاك
صافي القلب والنية
كنت ديما مشكاك
محرر العيشة عليا
كلامك هـو الكبير
والناس كتغلط وتصيب
إنما قـــول الخير
راه الشك صعيــب
ولا تسمعشاي لغير
سمع قلبك يالحبيــب
ولا تطلب مني تفسير
راك واعي ولبيــب
راجعت فعالي وقوالي
وكنت على نفسي رقيب
كلما ارتاح بالي
سمعت كلام غريــب
وكلما زيان حالي
شعلو الناس لهيـــب
مصاب كانو بحالي
وخطاو لفضول ولعيـب
أنا ما قلت والـو
هما اللي شقاو وقــالو
وعلاش تهتم وتبالي
خليهم كلها وحــالو
كلمات لحن وغناء رابح التيجاني
تبدال المنازل راحة
رابح التيجاني
قدري نبقى جـوال ليوم هنا وغدا هنـاك
والله يرحم من قـال عيش طوير فسمـاك
وإياك من الشعـور باليأس والإحبــــاط
ضوي طريقك بالنور وقلبك بالنشــــــــاط
جعل نشيـــــدك أمـل وغني للحب أغنيــة
عنداك ترضى بالفشل خليــك صامد شويا
حيرني أمري معـاك فلبعـاد تزيد لمحبة
ولما نكــــون حـداك كـما لو كنت فغربة
ياك لبعيــد علعين القلب ينسـاه بسرعة
وقلبك نتايا حنـين يلا غبت بلا رجـعة
ها نا مهــاجر ديما عســـى نحقق ذاتي
نرجع وعندي قيـمة نعطي معنى لحياتي
تبدال المنـازل راحة بعد الصمايم الليالي
من الحروالقرلواحة الله العالي يغير حالي
الناس
رابح التيجاني
الناس ياعيني جهلو وفين اللي باقي بعقلو
قدام المـال تلاقي لعزيز يبيــع أهلو
معاني الطيبة هانت وأسرار النفوس بانت
وليام لحبيبة خانت والشر مــاد رجلو
كلشي باغي يوصل واش داروا لي وصلو
تلقى الواحد يهبل يلا درك غيرو مثلو
لا خيرفهاد الحساد والطمع يعمي الفؤاد
فين غاديين بلحقاد را الظالم يلقى فعلو
البخيل زاد فبخلو والكريم يفوح بفضلو
لغصين ينكر أصلو ولا حد راضي بحملو
الناس ياعيني جهلو وفين اللي باقي بعقلو
قدام المـال تلاقي لعزيز يبيــع أهلو
الشهــــــــــادة للــــــه
ومـــا بغيــــــنا والـو ،
الزيــن وحــدو خــــذاه
وقــــــال ليـك ديــالو ،
فيــــــن تلقى بحـــــــــــــالو ،
ما عندك ما تســــــــــالو،
قمر ضوا سمـــــــــــــــاه والنجــــــــــوم ذبــــالو،
يلا كـــانت مـــــــــــــوالو،
وهــــــــاب جل جــلالو ،
وفرحــــــــان بهبـــــالو،
هـــــايم ماعرف مـــالو ،
وعشقنـا دلالــــــــــــــو،
غــــزال ومدحنـــــــــاه
خليــــــــــه تيهـــو داه
الشهـــــــادة للــــــــه
وما بغيــنا والـــــــــو.
رابح التيجاني
*أنت فشي شكل
عشاق بسرعة تمل ،
فراشة
ما لقات راحة
بين الزهور تتنقل ،
هاذي وردة فواحة
لكن هاذي أجمل .
*أنت فشي شكل
ويلا كذبتي سأل ،
عمرك ما كنتي فيوم
باليأس
ترضى وتقبل ،
أو يقولو عليك الناس
فلان فشل ،
أو توقف محتار
بلا قرار
مكبل .
*مازال ما بديتي
وخلاص مليتي
وما قادر تتحمل ،
لا صعب ولا سهل ،
كنتي يلا نويتي
لازم تكمل ،
وديما معول ،
تتحدى لمواج
وخا تكون جبل .
*وكيفاش وليتي
شوف تأمل ،
حالك تبدل ،
عييتي ما ترحل ،
وانت عارف الحل ،
ترجع كما انت
للطموح وتعمل ،
تعود كيف الأول ،
وأكيد غادي توصل
أكيد غادي توصل .
الأمل
رابح التيجاني
طبلة وكرســي وكــــاس داتاي
جـــالس منسي نستنى لي جــاي
نصـــبر نفسي ونترجى مـــولاي
ونقــول فهمسي مـا نيأسشـــاي
وشربت من كاسي وتنهدت آي ييـاي
على ما دوز راسي عيا وما تهنشــاي
كيومي كي أمسي مهموم ما فحالشاي
مالها طافية شمسي والزهر ما بغاشـاي
وتقادا كــاسي لا ما ما نجلسشاي
حتى لين نقـاسي والأمل ما باينشاي
عييــت نواسي عايش وما عايشاي
لا. لازم يا ناسي لازم ما نعجزشاي
يا خالق الكون
رابح التيجاني
قلبي يسبـح لمــولاه
يردد أللـه أللـه
كل ذرة فيا ترجــاه
يشملني بعطفـو ورضاه
لسـاني رطاب بكلمة
بالابتهال فالنور والظلام
وكفوفي مرفوعة للسما
بالدعــاء لرب الأنام
يا خالق الكون ياقدير
فتح لينا بيبان الخيــر
كون عويننا ف التدبير
وبارك عمالنا بالتيسـير
شحال وهبتنا من نعمة
كرمتي بها الكائنــات
وتقابل جحودنا بالرحمة
تورينا من فضلك آيات
وفقنا يا سيدي للهداية
وجعل وجودنا سـلام
جنبنا الشرور والغواية
لطف بنا وكفينا الآلام
كلنا عبادك يا لمعبـود
أنت لملاذ انت لمقصـود
حمدك صلاة كل موجود
غمرنا بجودك يا مول لجود
طامع فرضاك يا رحيم
بجاه النبي العظيــــم
ونور القرءان الكريم
والكعبة مقـام إبراهيم
(مقطوعة زجلية مقبولة من لدن لجنة الكلمات بالإذاعة المغربية )
ما زال نعيش
رابح التيجاني
بنيت لك جنة فقلبي
وسديت عليك
كنت خايف على حبي
وعشقي ليـك
كنت خايف تجرب مرة
وتضيع مني
تنساني من بعد العشرة
وتخيب ظني
تغرك الدنيا وتديك
بزواقها وما فيها
تغير حالك وتبليك
وانت ما تقد عليها
لا أنا مزاوك فيك
المغامرة خليها
ولا تعاند را صعيبة عليك
وعندها ماليها
لكن آه وما درتي يا غالي
وآه على اللي ما نويتو يكون
أنت اليوم بعيد على خيالي
هايم فكل مكان مفتـــون
جفيتي وما همكش حالي
مليتي وضــاق بيك الكون
الأيام اللي عشناها
خلتيـها فبيتي
وألف قصيدة كتبناها
طوتيها ومشيتي
خذها هملها أو قراها
ودير بيها ما بغيتي
أيام الماضي ما تهمنيش
قدامي الحياة ما زال نعيش
نتهنى ونرتاح
وتبرا الجراح
ومن بعد أحزاني
ننعم بالافراح .
(مقطوعة زجلية مقبولة من لدن لجنة الكلمات بالإذاعة المغربية )
ديما ناسي
رابح التيجاني
زعما أنت ديما نـاسي
وقتك عامر والبال مشغول
أنا عليا نعاني ونقاسي
وأنت توجد ما غادي تقول
ولما تبغي تجي وتواسي
تلقى ألف عذر مقبــول
ما كاين باس يا غالي
خلاص أنا رضيت بحــالي
ولفت لحزان ولغربة
تعلمت سهر الليــــالي
لكن لا تنسانيش عفاك
وتفكرني مرة وســــال
أنا قلبي ديما معــاك
تدرك مقصودك وتنـــال
ربي يحفظك لشبـابك
ويخفف حملك وعذابــــك
يعطيك ما نويتي فبـالك
وتعود فرحان لحبابــــك .
(مقطوعة زجلية مقبولة من لدن لجنة الكلمات بالإذاعة المغربية )
رجع لصوابك
رابح التيجاني
كلمــــــة وحدا
وهاجت أعصابك
وهجرك النوم
ما بغيتي تهدا
وتوفرعتــــــــابك
وتطوي الهموم
ولو كان بعدا
راجعتي حســـابك
قبل ما تلــــوم
أو جربتي شدا
مرة مع حبــــابك
عشتي مظلـوم .
ماعندي قيمة
وخا قريبة حداك
فرقاتنا ظروف
وعلاش ديما
أنت الحق معــاك
وانا ليا الخوف
ماشي جريمة
نقـــــولك عنداك
ردبالك شوف
قبلها كليـمة
بغيت بها رضاك
ولحب ولمعروف .
(مقطوعة زجلية مقبولة من لدن لجنة الكلمات بالإذاعة المغربية )
شكون أنا
رابح التيجاني
يـا من يســال شكـــون أنـا
جوابـي فلحـال أنــوار وسنـا
خيـر وأفضـال أفــراح وهـنا
آيـة فلجمـال طبيـعة فتــانة
شكـون أنــا
أيـامي مـوال أحلـى دنــدنة
غناتـها لجيـال بروح فنـــانة
ف النخوة مثال وفلحب نتفـانـى
شمـوخ لجبـال وهمة مصــانة
شكـون أنــا
نبع المفــاخر أصـالة وارتقـاء
طيبوبة مشاعر عزة وكبريــاء
تحدي وصمـود تضحية وفــداء
والكرم والجـود والنبل والعطـاء
شكـون أنــا
تعريفي مفهوم وتصريحي بايـن
واسمي معلوم ترددو لمــلاين
عالي مع نجوم وفلقلوب سـاكن
طريقو مرسوم ويفوز يلا راهن
أنـا الـمغـرب
مغرب المسيرة والتاريخ المجيـد
ومواقف شهيرة والتحام شديـد
منطنجة لكويرة بنـاء وتشييـد
وأعمال كبيرة على كل صعيـد
( مقطوعة زجلية من اقتراح الفنان نعمان
لحلو لحنها وغنتها المطربة نعيمة سميح )
مكنـاس
رابح التيجاني
مكناس الطيبة والناس
والتاريخ منقـوش آية
أرض المحبة والأعراس
والجمال فتـان وغاية
عروس الجبال
رحيـقها سكر
وديـان تجري
سلسبيل وكوثر
أنفاسها من الجنة
هــوا معطر
مضيـافة وكريمة
وقلبها جوهر
مكناس والأطلس راعيها
والمجد اختـــارها دار
منها وليها وساكن فيها
وســاير بيها للفخار
مكناس يا بلادي ويا ذكرياتي
أنت أنا وترابك روحي وذاتي
أنت غنـايا وفرحي وبشرياتي
يا ولف الطبيعة والأيام
والزيـن مواتي
يا حلاوة ما فــات
وروعـة الآتي
قلبي معاك
وحبي ليك
وكل حياتي .
(مقطوعة زجلية مقبولة من لدن لجنة الكلمات بالإذاعة المغربية )
مخدوع
رابح التيجاني
فكرت وعييت ما نفكر
ولا لقيت حل لهاد الحالة
وآش يفيدني قدام المقدر
يلا ما حضر لطفو تعالى
كانوا الناس حبـابى
كلهم ليا خـــوت
فاتح ليهم بــابي
لا بواب أو ساروت
وفلحظة بدا عذابي
شفت بعينيا المـوت
ضاع مالي وشبابي
فات اللي لازم يفوت
كنت مخدوع كثير
بالدنيا بالناس ونفسي
كنت مخدوع كثير
بيومي بغدا وبأمسي
وفكرت وعييت ما نفكر
ولا لقيت حل لهاد الحالة
وآش يفيدني قدام المقدر
يلا ما حضر لطفو تعالى
رجايا في الله سبحــانو
يفرج عليا الاهــوال
يداوي قلبي وأحــزانو
يبدل من حال لحــال
يرحمني يسـامح من خانوا
وينور طريقي آمــال
ويغطيني بفضلو وحسانو
خير وبركة وراسمال
ويجعل يقيــني قرءانو
هداية وراحة للبـال
أنا جيتو طالب حنـانو
ومولايا ما يرد من سال .
( كلمات لحن وغناء رابح التيجاني )
ملل
رابح التيجاني
ياك حبنا كــان
ف العنفوان مثل
وعطى البرهـان
ف القوة والأمل
دغيا طواه النسيان
والفتـور والملل
خمد البركان
وصبحات النيران
رمــاد ودخان
وبدات لحزان
تحجر الوجـدان
عيا قبل الأوان
فين حرارة الأشــواق
فين أحــلام العشاق
والكلام الزين البراق
والحب النابع من لعماق
ضيعنا الحب والهنــا
ضيعنا حتى الذكريات
تقول بحال يلا عمرنا
ما تعانقنا روح وذات
أنت السبب ولا أنـا
أو هي الظروف والحياة
علاش مانحاولو مرة
نتقـاربو كيف زمان
تعـودحلاوة العشرة
وتدفا قلوبنا بالحنـان
(مقطوعة زجلية مقبولة من لدن لجنة الكلمات بالإذاعة المغربية )
نداء الفرحة
رابح التيجاني
شحال ما طالت حزاني
وخانتني الأمــاني
ما غادي يضعف إيماني
ومهما كانت مأساتي
شعاري ديما فحياتي
ندير يقيني في الآتـي
وكيف ما كانت الظروف
حاجة وحدا شـاغلاني
نفكر وندبر ونشوف
الأمل عمرو ما يخطاني
نغلب الرجا علخوف
نتحدى خير ما نعاني
خسارة وعيب يالحبيب
نسلم روحي للعوافي
ونديها فلبكا والنحيب
هاز الدنيا على كتـافي
ياك لينا فيها نصيب
والله ميزانـــو وافي
الدنيا ساعة وتفــوت
والباكي فيها مشموت
وحرام ما تفرح لقلوب
قبل ما نلقاو المــوت
(مقطوعة زجلية مقبولة من لدن لجنة الكلمات بالإذاعة المغربية )
الطاحونة
رابح التيجاني
قلبي سفيـــنة والدنيـــا بحر
والحالة حزيــنة مـا عندي زهر
والروح رهيــنة بين مـوج و حجر
وياليـل سجنتينا لا بر ولا فـجر
شلا ما نعـــاني وشحال قدني نقدر
غلباتني الأمــاني ومــا فادني صبر
شيبــاتني حزاني وخــانني العمر
والوهم عيــاني والكذوب والغدر
آه على قلبي وآمالو وآه يا حلامي لمجنونة
الدنيا كلها وحـالو والناس ديما مفتـونة
ومالو سعدي مـالو طريقو تقول مدفونة
صدقو لما قــالو الدنيا الدنيا طاحونة
(مقطوعة زجلية مقبولة من لدن لجنة الكلمات بالإذاعة المغربية )
الحب علمني
رابح التيجاني
ماشي بعيـد تكـوني
بسمة تداوي الجراح
ترجعي النوم لعيـوني
وتخليني شويا نرتـاح
لكن أنا شعوري مات
وقلبي سكناتو غبـينة
سامح فلحب والحياة
ومل الحكايات الحزينة
ماشي بعيـد تكوني
أنت حبي الموعــود
معاك ننسى ظنوني
ونلقى الأمـان المفقود
لكن أنا صعيب عليا
نغــامر بقلبي ثـاني
يطير لرموشك هدية
ويبقى فسماهم وحداني
ماشي بعيد ماشي بعيد
وألف مرة يمكن ويمكن
لكن أنا خايف نزيد
خليني عافاك خليني حسن
هــو الحب علمني
نسد البـــاب ونسهر
وندير يبنــو وبيني
ألف حجـــاب واكثر
ونخدع قلبي وعيـني
نعاود الحســاب ونفكر
ويلا كان لازم يديني
مستحيــــل أنا نخسر
(مقطوعة زجلية مقبولة من لدن لجنة الكلمات بالإذاعة المغربية )
راحة البال
رابح التيجاني
الصحة على قد الحال
والزمـــــان غلبنا
فعماقنا مات الأمال
واللـــــــه يرحمنا
قطعنا لياس ألغزال
وشحــال ما نتمنى
أنت باغي لجاه لمال
وتعيـش ف جنة
وحنا ضاق بنا لحال
ما شفنا ما تشوفنا
عيانا الرجا ولسؤال
ومصـــاب ما طلبنا
دانا الوهم والمحـال
دانا تلفنـــا و دوخنا
الدنيا متاهة خيال
ســـراب يخدعنا
وأيامنا بحال بحال
لا بشرى تفرحنا
و نقولو راحة لبال
ما عندنا ما خصنا
ياما نبغيو وشحال
باركا علينا حبنا
الصابر لا بد ينال
نصبر نصبر نتأنى
حال حسن من حال
والدنيا غادا تفنى
يكفينا نكونو مثال
يلا الحب جمعنــــا
الرضاهوراس لمال
كنـز عمرو مــا يفنى
يلا حتجنا الأموال
را يحضرو ويغيبو
ويلا نقصنا الجمال
الأخلاق ينــوبو
المهم راحة البال
وكلها ونصيــبو
مبروك عليك
رابح التيجاني
مبروك عليك
قلبي فرح ليك
وجيت نهنيك
من عمــــــاق وجداني،
دركتي بمجهودك
مناك ومقصودك
وعطيتي لوجودك
أسمى المعــــــاني ،
نجاح الانســان
تكريم وبرهـان
على قوة الايمـان
والجد والتفــــــاني ،
ويلا فشل مرة
يحسبها عثرة
يطويها ذكرى
ويحـاول من ثــــاني ،
النجاح خطوة
تابعا خطوة
شعار وقدوة
فدروب الأمـــــاني ،
تعبتي وشقيتي
ما يأستي أومليتي
وصبرتي تحديتي
وفضلتي تعـــــاني ،
إرادة من حديد
وطموحك عنيد
خلاو البعيـد
منك دانـــــــــــــــــي ،
مبروك عليك
قلبي فرح ليك
وجيت نهنيك
من عمـــــــاق وجداني .
(مقطوعة زجلية مقبولة من لدن لجنة الكلمات بالإذاعة المغربية )
فوق العادة
رابح التيجاني
عشــاق فوق العادة
نموت وما نتعادا
وخا محبـــوبي تـــاه
ياك المحبة عبــــادة
هي رضا وسعادة
سر من عند اللـــــه
الحب عندي شهادة
وخا جهدي يتقـادا
معشوقي ما نخطــاه
وحـالنا يا ناس هادا
طبيعة فينا وعادة
المغروم يذوب فهواه
أبدا ما يسمع إفادة
ولا قالك هادا وهادا
الحب وحدو هو دواه
الحب شبيه الولادة
ما يتأجل ما يتفادى
نفرحو بفرحو وبشقاه
مرة وحدا بلا إعادة
شحيح وما فيه زيادة
سعداتنا يلا حنا لقيناه
ويلا هداه الله ونادى
نجيه فلحال نتهــادى
واش نكـــون أنا لولاه
عنيــد وباقي نتمــادى
كلي رغبة وإرادة
وحلمي لازم نحيـــــاه
الصعيبة عندي معتادة
ولفشل ولياس بلادة
وعمرني ما نقــــولك آه
صفاوة القلوب
رابح التيجاني
علاش يالعمر
نيـران لعداوا
تسقيني الـمر
وكلك حلاوا
تعلمني الصـبر
وتزيد قسـاوا
نـاوي الغدر
ومبين الصفاوا
علاش
أشنـو تخسر
نعيشـو خاوا
أفكـار الشر
تتبخر هــاوا
فرحتنا تكبر
والقلوب تداوا
ويصفا الجوهر
يلمع بالنقـاوا
(مقطوعة زجلية مقبولة من لدن لجنة الكلمات بالإذاعة المغربية )
بــــــــــــــزاف
رابح التيجاني
واااااابـــزاف عليا
أمـــولاي رفق بيا
ولطف يا لطيــــف
راااالفرحة قـــوية
جـــاتني بلا نوية
والقلب ضعيـــف
وانا مجنون شويا
لا أكثر من شويا
وعقلي خفيـــــف
يكــــــــفي أغنية
أو بســــمة وردية
ترجعني رهيــــف
وضحكاااات لالا ليا
داتني كلي بما ليا
بخاطري وبالسيف
واااااابـــزاف عليا
أمـــولاي رفق بيا
ولطف يا لطيــــف
واللــــــــه يلا هيا
وحـــدا فهاد الدنيا
والباقي تخريــــف
غزاااااااالة ومغرية
ولذيـــــذة وشهية
وحبها عفيـــــــف
طااااااااهرة ونقية
وأغـــــــلى هدية
ومقامها شريــــف
واااااابـــزاف عليا
أمــــولاي رفق بيا
ولطف يا لطيـــــف
راااااااالفرحة قوية
جـــــاتني بلا نوية
والقلب ضعيــــف
مــا نصبـــرش ثانيا
أو نفـــــــــــكر فيا
شعـــوري عنيـــــف
انا مجنــون شويا
لا أكثر من شويا
وعقلي خفيـــــــــف
أنت اللي لينا
رابح التيجاني
أنت اللي لينا
رابح التيجاني
ياك أنت ديالنا
خونا محسوب علينا
شكون يهتم بحالنا
يلا ما اهتميتي بينا
ما سولتي مالنا
أو فكرتي فينا
وف الدنيا ما بقالنا
غير قليب يبغينا
خلاص لا تحافي
وطفي العوافي
وإياك تجافي
را ماداز كافي
هد كتافي
وراحنا عيينا
الحب ما خافي
ما يحتاج قوافي
وقلبي صافي
بحبك دافي
فرحان معافي
ويغني لينا
نرجاك يالوافي
يادوايا الشافي
يكفينا صافي
خلاص لا تحافي
وطفي العوافي
بعطفك هنينا
(مقطوعة زجلية مقبولة من لدن لجنة الكلمات بالإذاعة المغربية )
حكاية
رابح التيجاني
ف البداية
كان هو وهي
كانو اثنين ،
كانو جيراني
عشر سنين ،
ديما ضاحكين
غاديين جايين
متعانقين
مبشورين ،
متعاهدين
على الحلوة والمرة
على الصفاوة والعشرة
وقانعين
بالحب
دنيا ودين،
وبعيدين
على الناس
والشياطين ،
ف البداية
كان هو هيا
كانو اثنين ،
ومن يومين
غابو
غابو فين ؟
من يومين
شفتهم مفارقين
كانت غضبانة
وهو حزين ،
مالهم ياعين ؟
صابتهم عين ؟
أو كانو مخدوعين ؟
فرقاتهم الدنيا
أو الناس
الحاسدين
الحاقدين ؟؟
خسارة ياعين
ف البداية كانو اثنين
ف البداية
كانو اثنين
كانو اثنين
(مقطوعة زجلية مقبولة من لدن لجنة الكلمات بالإذاعة المغربية )
