-->
يلا بغيتي تكتب
قليب عامر
رابح التيجاني .. يبراير2011
الطريق للأسف ساحة معركة
سيارات مهمولة
للأسف
رابح التيجاني
يلا بغيتي تكتب
الأمر ساهل ماشي صعب،
جبد ورقة وحدا،
وشد القلم
همهم وغمغم ودمدم
وزعم
وبدا،
ورسم
وردة،
، مادها قرد لقردة
وخمم
وكتب بشويا
عاود ثاني بشويا
كتب كتب بشويا
عاود ثاني بشويا
آش قال ليها هو
وباش جاوباتو هيا
قال تفضلي ألغزالة
وهي جاوباتو : أوهو
لا لا،
كان عليك تهدي ليا
على الأقل كاو كاو
الله يهنيك تشاو تشاو
ورد عليها : مالك غضبانة ؟
قبلي على الموجود
الحالة عيانة ،
ومادا بينا
مادا بينا نتاواو،،
وكتب أصاحبي آش شفتي
كتب أصاحبي آش سمعتي
ياك القردة
لاحت على وجهو الوردة ،
ياك قالتلو:
سير كون راسك بعدا ،
خلينا
أحسن لينا
أصدقاء نبقاو
بلا ما نتعاداو
تشاو تشاو ،،
ويلا تفارقو خرمز الورقة
وردم أصاحبي القلم
وكتب بشويا
كتب كتب بشويا
عاود ثاني بشويا
القردة حمقة
ودابا تندم،
كون خدات الوردة
وباعتها ف الخردة
وشرات آش بغات
بلا صداع بلا غوات
بلا ما تحلم،
قول ليهم يا صاحبي هداو
شربو من عين الحكمة
ورواو
ويلا ما بغى حد يهدا
ما بغى حد يحشم،
زطم
حكم وتحكم
قول شكون فيهم ظلم،
ياك القلب أهم من المعدة
وياك الحب سبق الزردة
واش أنت مع كاوكاو
ولا الوردة؟
إيوا كتب أصاحبي وزمم
وحسم
ويلا ما قدرتي ضرب الطم
وكتم
لاتكتب لاتتكلم
تبسم
وقول الله أعلم
دير نقطة ف آخر السطر
سالي وختم،،
باش تكتب أصاحبي
لاتندفع ولاتسأم
فرح وتــــــــألم
تراجع وتقدم
ودافع وهجم
وضرب وجمع وطرح وقسم
وسبق ما ديما ترتاح وتنعم
وجزم تسلم
وزير ورحم
شوف ولامس وسمع
و دوق وشم،
وشمشم ،
بعد وقرب
شرق وغرب
طل من فوق
وقيس من كل جنب
تهدن وتعصب
تنشوى وتعدب
قتحم وتهيب
قصح ورطب
غضب وطبطب
ترزن وقشب
عرم وشطب
زين وخيب
عيـــــــــــش وجرب ،
كتب بالما
كتب بالزفت بالحليب وبالدم ،
وحلم حلم حلم
مزيان تحلم ،
طير وعلي ف السما
ويلا دختي شد الأرض وقرم
رزم ،
ما فيها باس مرة مرة
كون عمى
صم وبكم ،
ويلا حفات ليك وتقداو
وما بقيتي تفهم،
تعلم
تكذب
يلا ما كنتي ديجا معلم ،
ولا تزرب لا تسرع
باش تفيد الزربة ؟
را ما فيها نفع ،
الناس سولو الجمل
أما سهل ؟
تنزل
ولا تطلع عقبة ؟
جاوبهم: هم هم
يلا كنت مثقل
هم هم ،
وهكداك الكتبة
رسالة حمل
أمانة وأمان
ما تمشيش مع اللي كان
ما تحاملش مع التلفة والدوخان
مع الخوا والزربة ،
واش بيهوم غادي تحطم
زعما شي رقم ؟
صدقو اللي قالو
المهم توصل
وخا معطل
خير من والو ،
الكلام المسقم
كيبغي تملح وتبزر
وتحلي وتحرر
وتكومن وتنسم ،
تعلم
العادي خرج منو العجب
لمع النحاس حتى يرجع ذهب
الأمر ساهل ماشي صعب،
حتى حاجة ما بعيدة
بالإرادة العنيدة ،
ويلا المزيودات خواو
والأفكارتعكسو وعصاو
والكليمات والتوشيات مشاو
معكتيهم وعييتي وعياو،
خدم على حكاية جديدة
خدم
ربط وحزم
الكلام ضروري يتلم ،
ويلا طلعات القصيدة شادة
بوسها وعلم
وبصم ،
أما يلا ما جاتش مقادة
هدم
وعاود بني وهدم ،
ولا تهتم
وكتب كتب بشويا
عاود ثاني بشويا
ويلا تولدات
كيف بغيتي وبغات
زغرت يويو ها هيا جات
وختار ليها سميا
وهكدا نكون درت ما عليا
ونتمنى تحاول وتحاول تكتب
وتزيد تغوص ف الروح والقلب
وحتى نعاودو نتلقاو
ونتهجاو القصيدة
ونقراو
سلامي ليك
وتبارك الله عليك
و تشاو تشاو
قالك بغى يغني
رابح التيجاني
يلا بغيتي تغني
توكل على الله وبعد مني،
هرنط فخاطرك
وخليني مهني،
غوت أخويا مع راسك
انا ما قادر على صداعك
آش بينك وبيني،
باغي تحمقني
تخرج لي عقلي بموالك
وتعصبني،
دوك لوتار ساويهم بعدا
دوزنهم تطلع النغمة مقادا
ويلا ما قفلتيش
جاوبني،
خود لك عرقسوس وحليب دافي
وعسل حر صافي
وكحل وسوك وحني،
لبس كسوة أنتيكا
رطب شعرك ودير تشويكة
شنتفو وخرمزو
صبغو بلصفر والبني ،
غوت وهرنط
طلع ف السلوم وهبط
هز وحط
وجبد ف الميازن وخبط
فرح ونشط
عوم فبحرك
ويلا وصلتي للشط
نعس على الرملة تشمس وغني،
وتوكل على الله وبعد مني،
بدل الساعة
قلب عليا
وفوتني،
ما باغي تلوث
لقلبي ووجداني وودني،
دير دويرة قصيرة
لاكادير والصويرة ،
ويلا بغيتي نيت دورة
سير لمراكش وزاكورة
شبع مزيان بالفولكلور
وغير يتنفخو حناكك
رجع للمعمورة،
عسكر فيها شي شهورة،
ما تشوف حد ما يشوفك حد،
تخلوا وغول
وخود لك عطلة نهار لحد
سير فيها لسوق الحد،
ما يهمكش البعد،
روى من الحلاقي
وابداع الزناقي ،
وشوف كيفاش تدمج فألحانك
الدجاجة كتقاقي،
خلط مقام شينوي ومقام عراقي ،
وميزان من الموزاميبق
مع شويا ديال التخربيق
الفيزيون واعر
لاقي يلا لقيتي ما تلاقي ،
ما فيها باس
هاد الشي اللي بغاو الناس،
الغنا ما كاين ما أسهل منو
كلشي تلاح ليه وكلها وفنو،
الفولة لمسوسة يختارها فروج عور
وبحال تغريد الكروان بحال تعواك البقر،
الله يرزقنا غير الصحة والسلامة
وبزاف ديال الصبر ،
ما يهمكش أصاحبي كلام حسادك
شارك وزيد شارك
وغرق الدنيا بأعمالك
الله يقوي الخير ويبارك،
وعليك بالماركوتينغ والتسويق
وزوق تبيع ودفع كبير وعيق وفيق،
وغير ترجع مغني
أنا مزاوك بعد مني ،
خليني مهني ،
ويلا أنت عوال تمتعني
متعني
برعني أخويا برعني
الله يزيزنك أو يصمكني.
وها العار يا إهل الفن
فرحو وسعدو
حتى حد ما معني،،
أنا مع راسي مع جني ،
مرة مرة كيفيقني،
كيزعزعني
دير بحال سيادك
عري على كتافك
تدرك مرادك،
،ويموت ليا ف الخط
والو غير يغني ،
كيخطط زعما ويبني ،
يترفح بالزربة
يضرب غير ضربة
أغنية وحدة ويحصد ويجني
ياك هادي هي الطريق يا التوجيني،
هادي هي الدنيا
تجي بالقدم ولا بالنغم ولا
قيلني
أودي راني عييت
صافي بيريمي تفوتيت
وشكون هاد المغضوب عليه
اللي زهرو مقعد ليه
وجاي بيديه ورجليه
يسمعني،
؟خليه
يستاهل هانا غادي نبدا ليه
والله حتى نغني
وخا غير بيني وبيني .
وحشة شعر عبد الوهاب البياتي لحن وغناء رابح التيجاني
يلا بلاك الله بالسياسة
رابح التيجاني
، يلا بلاك الله بالسياسة
، وبغيتي حتى انت تدير بلاصة
نقريها لك أصاحبي بلا مدرسة ،
أول حاجة
ما كاين لا فن ولا هندسة
شري ميزان الخيط
وميزان الما
ومــــلاسة
وغمس وطلس
سيما ورملة وجبص
وعجن ودمص
ودير زوين مع الناس
بطــــالة وبزنــــاسة ،
هدر بالسيـــــــــاسة
وسير بالسيـــــــــاسة
وكــــــــول بالسياسة
، لعل وعسى
وشكي وبكي
وقول خوكوم
بحالكوم
، شحال عانى مسكين و قاسى
أنت مبلي بالقهوة
داوم على الجلسة ف القهوة
، وعصر
وختـــار لك كاع نشوة
دوخ ونشط وسكر،
حلان العينين خاصو الطـــــاسة،
، ويلا اقتضى الحال السبـــاسة
تفكر أصاحبي لحباب
واللي غاب
واللي نسى الحانوت
، أو تناسى
وسهر حتى للفجر
حتى يعوك الفروج
، ويهلل المودن ويكبر
إيوا ديك الساعة
فرقو الجماعة
، وما تغنيش نوضو يالنعاسة
صهط بحالهم
تزاحم معاهم
،وشخر
ودخل جنب لشي مكتب
كيقولو كيف الشرق كيف الغرب
ويلا ما طلعتيش غوت وسب
، وبلاني المرة الجاية للرئــــاسة
هكذا كتكون السيـــاسة
سايس وسايس
دور معاها فين دارت
صاحب المرفحين والبؤسا،
، الشواش والرؤسا
ونوصيك ضحك شويا
، ولكن كثر من عبــــس
وتكون عندك فراسة
تقراها ف السما وهي طايرة
ما تدهش ما تخاف
تحزم وزعم تاكل اللحم
، وديما عينك على الهموز عساسة
كون جبهة سنطيحة
، وقوس على القواسة
لا تفلت لا جنازة ولا سبوع
لا طلاق ولا رجوع
لا هدية ولا دفوع
واللي حب توقف معاه
وقف وجلس وديرها بستاش
، ما كاينش الممنوع
وحفظ مزيان شي كليمات
، وعبر بسلاسة
وعاون بالحركات والسكنات
والنظرات والبسمات
، وركز على القضايا الحساسة
وما تنساش هاد السطر
عاود وكرر
وقت ما قالولك هدر
سرسر
بلا ما تفكر
احنا اقتصاديا واجتماعيا وثقافيا
وجر،
، وجرجر
حنا جابنا الواجب
ما طامعين إلا ف الحب وجيب
وسخها يبقى فيها ما بغينا عيب
واش غادي نديو كثر من شبر ؟
كون ف المجتمع فاعل
وبقى مرفوع
وديما قول المطالب بغينالها إطار
، مؤسـسة
هز لا فتة ولا جوج وشعشع
وغير تشوف الكاميرا حيح ورعرع
وهرس الكراسا ،
عنق اللي لقيتيه
وضحك حتى يبانو ضراسك
وبوس وبوس
، ما ينجحو غير البواسة
جمع ولاد الدرب
مزيان الانفتاح والقرب ،
ويلا لقيتي لمة على الضامة
، نبر ولعب
ويلا صادفتي مشانقة
شاركهوم حتى انت ضرب
قمش وعض وركل وشتم وسب
ويلا غلبوك
، بدل الساعة وقلب
، علق وهرب
وخا مضروب
، هكدا تكون محبوب
وحيث تبعد شويا
خلف خطوة خطوة بحال كسنجير
سير دقة دقة كيف قال مـسكير
ولما تعيا قول آح
وجلس وارتاح
ورك وتكا
، وشجع المنافسة
، ويلا شفتيها نايضة نوضة
، دابا راه ولات موضة
، بعد من الصداع والفوضى
، الزيادة مرفوضة
سايس أصاحبي سايس
ياك بغيتي تقتحم السياسة
إيوا شويا ديال العقل
والمنطق والكياسة
القلوب أصاحبي تصفى بالسلام
والحق ما يضيع وخا تطول ليام
الحق كيف العود لازمو اللجام
ويجي يجي فوقتو بقواعدو بالنظام
هادا ما تعلمنا من الناس القدام
، الخير ديما أمام
واللي بغى الرضا يقول نعام
، اللي بغى الرضا يقول نعام
إنما يلا بلاك الله بالسياسة
كيف كتفهم أنت السياسة
وعاجبك تدرم باش تزيد لقدام
ما شفتني ما شفتك
، الله يسعد المسا
وينجينا وينجيكوم من الوسواسا
والخناسا
ويخلينا ف صفاوتنا
ويطهرنا من النجاسة.
طاحت الشتا
رابح التيجاني
طاحت الشتا
خلاوها طايحة
مــاجمعوهاش ،
حفرة وكلتة
وروايح فايحة
باش بغيتي باش ؟
الطريق مزفتة
يقولـو صالحة
وهي ما صالحاش ،
المصدومة موعتة
دماياتها سايحة
لا إسعاف لا فراش ،
والمعلمة سالتة
والنتيجة واضحة
سعدات لي ما قراش ،
والماكلة مزيتة
حارة ومالحة
وسدينا . ما بقاش ،
فكل شواري حوتة
سنطيحة كارحة
تشطح لحنــاش ،
لقبايل مشتتة
ضرباتها جايحة
كلشي غشــاش ،
الحديقة ملوتة
شجارها مسامحة
فلوراق ولعشاش ،
زريعة نابتــة
مجيفة واكحة
وما مسوقاش ،
وجرادة لاهتة
فين غادا سارحة
والوقت ما بقاش ،
لو أنا وانت
مشامم فايحة
فاش جاتنا فاش ؟
نتعاونو إيمتا
وليام رايحة
نتفقو وقتـاش ؟
طرقاننا شتى
ولضواو لايحة
وما تفهمنـاش ،
الربح فلتة
وليام الناجحة
للي قاد علاش ،
للقلوب التابتة
ولعقول الراجحة
والعارفين كيفاش ،
أما الباغي حرتة
وكتافو طايحة :
العماش ولا بلاش ،
أو طامع فورتة
وريوقو سايحة
مولف التكماش ،
إيوا سير حتى
تغني النايحة
يطيب المشماش ،
يدوق الشمتة
وينوض حايحة
ويشوف التشاش ،
النفس ميتـة
نقراو الفاتحة
وياهم من عاش ،
الخبزة بايتة
كارمة وقاصحة
عافوها لمشاش ،
والحقيقة الفالتة
ف الهوا سابحة
يختصرها فلاش ،
ضربها بسكتة
الكلاب نابحة
والقماش والترياش ،
طبل ف هوتة
لمن المناصحة
ومع من ، ولاش ؟
الساعة فايتة
والورقة الرابحة
والو.بح. مكايناش.
الزيتون
رابح التيجاني
الله يبـــــاركها تربة ،
مكناس مرتع الصبا ،
مجمع نـاس الطيبة ،
أهل الصفا والمحبة ،
مكناس راحة للروح
ولافة بزينها
ولوانها الزاهية المذهبة،
فتانة
بالسر والسحر والشعر مصوبة ،
إيه عليها أيام
بعراصي الزيتون
كنا صغار
نضحكو ونبكيو بلا سبة ،
نقيلو نلعبوبباب الدار
حنا نقلبو
وواحد يتخبا ،
عفارت كنا
واعرين خطار
ولما نعياو نرجعو بالزربة ،
للخربة ،
ندورو بالطبلة
نشوفو بمحبة
لمي وبا ،
ويلا شبعنا
نرغبوهم نخرجو
يالله سيرو تلعبو ف العتبة ،
حدا العتبة
ما تفوتوش العتبة ،
الله عليها يام
حتى حاجة ما كانت صعبة ،
بالفاخر نتعلمو الكتبة
فلبيبان ولحيوط الرطبة،
نعومو فلواد
وندرعونقطعوعرض بوفكران
بخشبة ،
نقلدو عومة الجرانة
أو عومة الكلب تابع كلبة ،
نطلعو لشجار الزيتون
نتعلقو بحال قرود الغابة ،
نقطفو زهر الحامض ولارنج والليمون
ونسرحو مع الدالية والعنبة ،
نحيدو التوت والكرموص والرمان
هادي خضرا وهادي طايبة ،
نلعبو الطرومبيا
ونديرو قتيتة بعظام المشماش
نصنعو المقلاع والكروصة
وشحال من لعبة ،
وكمنجة كرشها طارو
ووتارها كابلات
ويدها وقوسها قصبة ،
نجريوحفيانين
فالزناقي ضيقين
تابعين كرة مقولبة ،
ونسلتو لسطاد نشوفو الكوديم
ما تهمنا زرواطة ولا سمطة
ولا ركلة مجنبة ،
ولكن نشوفو حميدوش ومبيري
هادي شوتة وتخريجة
وهدي طيحة وقلبة ،
هوبا
تهزات الشبكة
اصابة اصابة ،
ونجيبو الصداع كلما خرجنا
ودعاوي البلا
سيرو الله يعطيكم ضربة ،
ونشكيو
نلقاو لفعالنا الف كذبة ،
ونلبدو حدا السقاية
نبسلو على البنات
عطينا عفاك شربة ،
الخبازية وكوربات الهندية
و الشفنج كل شفنجة يا شفنجة
بنينة ورطبة ،
الحوانت مصافة
ولرزاق مختلفة
مقسمة ومكتبة ،
الله عليها يام
بالمعاركة بالجبابرة السويقة كراوة
ندقو لبواب
وإيوا اراك يا هربة ،
نهبطو حدورة مدردبة ،
نطلعو عقبة ،
نجريو بحال الزواق
من رحبة لرحبة ،
ونعاودو حكايات مشوقا
على باباخ ومحيرو وحماقا
ومعيوقا
وفاطنة الشهبة ،
وحميدا قيبا ،
كان يحرش هادا على هادا
نتصارعو على الصحة والزعامة
وانت شحال مكلاصي ف الرتبة ؟
ايه عليها يام
والزاويا والقرايا وعيساوة
وتهامة وهل التوات وحمادشة
كانت عزيزة علينا الجدبة،
والجلسة مع الطلبة ،
واتاي بالشيبة ،
يحفظكم من العين وخميسة
والحرمل والشبة ،
نقراو القرءان
ليلة الخميس على ضو لامبا
او الشمعة دايبة مدوبة ،
كان الما بارد فالخابية
واللبينة فالقربة ،
وهاي هاي يلا برزطنا الهبيل
ونشبناه نشبة ،
هاالعسل ها الملوخيا
باش يغضب ديك الغضبة ،
وينوض علينا مندبة ،
ويتبعنا
يغراق ف الغيس حتى للركبة ،
ونضحكو
هانيين مهنيين
ويلا مرضنا
ما نعرفو ممرضات ولا طبا ،
دوانا الزعتر وفليو والتوما
والكمون والحلبة ،
ويلا ضربنا البرد
وشداتنا الكحبة ،
البيصارا بالزيت البلدية
أو البلبولة براس الحانوت
طايبة،
وديما صحاح سامرين فايقين
رادين البال للحومة
هادي مجلببة ملثمة ومنقبة ،
وهادي مقزبة ،
ما تفلت لينا لا صغيرة ولا كبيرة
هادي مزوجة وهدي عزبة ،
هادا عيا بالخدمة
وهادا ما ضرب فيها ضربة ،
هادي زوينة وهادي خايبة
هادي مقادا هادي عايبة ،
هادي عندها اليوم الخطبة
وغدا تمشي مع عريسها لاروبا ،
سعداتها
تخرج من الزروبا والدروبا
والخوف من الحناش والطوبة ،
اسيدي دارت ف البحر طريق
وفالزرب ترعة
وفالحيط ثقبة ،
زعما كنتناقشو
طارت خليها تطير
ما تضيعش الوجبة ،
ايه عليها يام
نديروها بستاش
ويلا حصلنا مشينا صوبة ،
ناكلو ونغوتو
الماكلة فيها زغبة ،
وندابزو مع عدو الحيوان
المسخوط جيف القطة بقنبة ،
وشحال افتخارنا بالنخبة ،
بنشمسي والمسطاسي
المزوار والتراب والعرايشي
الصافي والسحاقي والوزاني
اليوسفي وبن الطايع
تشعر قدامهم برهبة،
واعتزازنا برموز الثقافة
المنيعي وبنزيدان
الدمناتي والزيتوني عبد السلام
وبوحمالة والحجام
والطريسي والجابري وبن حلام
ديما ليهم هيبة،
والتهامي ولد منانة
بعودوعندما ياتي المساء
وتيمود والزغننة ،
وأراك أراك
على غنايا هنا وهناك
يا الساخي بيا ومساك مساك
ياللي عقلى ما ينساك
وسالبة سالبة ،
سالباني يا بنت الناس
سالبة سالبة ،
والشتا تا تا تا
وولاد الحراثة
والمعلم بوزكري طيب لي خبزي بكري
دابا ،
و"دويرة دويرة والشمس مع القمر
مزينها عشوية تفتح بالزهر
سيدي علي بنداود عندو بنيا صغيرا
تبكي وتبكيني وتقول أبويا "
إيه على الغربة
وآح من البعاد والغيبة،
وإيه عليها يام
وولاد مولاي مليانة
وسيدي عياد يالسوسي
عند راسو الماكنا
الأولياء الأصفياء
المبشورين الألبا ،
الشيخ الكامل وناس التصوف
القريبة من المعاني والمقربة ،
والمجدوب فسوق النسا
وسيدي قدور العلمي
مشات دارو ف حمى رجال مكناس
مكركبة،
فيرمات التفاح واللوزفيها طرقان
ولات البلاد للموسم ولافوار والعودان
والسلعة مهربة،
وما نساش بسطاء كانو علامات
معيزا و بهيون وشلا شخصيات
والكناوي بالطبل وقرقبة ،
وغريب على رجليه
سبق الطوبيس من الزيتون للهديم
والناس معجبة،
والمعلم الخياط
والمطوي والسبسي والغربال
يقصص العشبة ،
أوبا طاحت التشدية
ايوا هاك تقنديحا على الرقبة ،
إيه عليها يام
كانت النسمة نسمة
والغلة غلة والما ما
والخضرا خضرا
حلوا وعذبة ،
كنا سعداء حتى فشقانا
ما نعرفوش لا أحزان ولا نكبة ،
عرصة بادو
وعرصة بنسعيد
وكرمة دو ه دوه وتيران جبالة
والشراشروالسلوقية والروى
والدار البيضا ودارنا رايبة،
طاح الجامع
كملو عليها واطاوها
لقاوها سبة ،
إيه وحجو لابسا كل ما لقات
وحنا تابعينها بلغوات
من الزيتون للقصبة ،
والغالي يلقط لوراق من الطريق
ويديرها فجيابولاش تليق
بوحدو عارف آش خبا ،
والعريصة والدحش مربوط
مسكين صابرللرهوط
وحنا كلشي بغي يركب ركبة ،
سيرو الله يقطع حسكم
اللي ما رباوه ماليه
عند المخزن يتربى ،
ايوا هاك ؟
وباب اكبيش باب القصدير
باب الجديد باب منصور
باب بردعيين والبيبة،
وسيدي عمرو والمرس والنهضة
وروامزين وكاسكروطات مولاي با ،
والستينية ولالاعودة والدريبة ،
وأبولو و فيلم لفريد
وفيلم لطراس بولبا ،
والمونديال والاطلس
ونشوفو دوستي
والجفون فايضة وساكبة ،
والبرج والسباتة وبني محمد
صهريج السواني والملاح
بريمة وسيدي بابا ،
وطريق الحاجب
بالصفصاف محجبة ،
ومول لواني والكواي
ومول حوايج للبيع والشواي ،
والغياط والطبال
والطراح والزبال
وحنا ما ضاربين حسبة ،
تطلع ولا تهبط
حنا إيه مالنا
ياك الدنيا لعبة ،
ويلا مرضنا
ما نعارفو ممرضات ولا طبا ،
دوانا زعتر وتومة وفليو وحلبة
ويلا شداتنا الكحبة
البيصارا بالزيت وكاس حليب
او البلبولة براس الحانوت طايبة ،
كنا كنحبو الحياة
وعندنا ارادة ورغبة ،
اليوم العراصي نهبوها نهبة ،
وزعوها ديورحفات ليهم النقشة
والسيف نبا ،
والعود لدهم كبا
وهادا حال الدري يلا حبا ،
بني وعلي وسير وخلي
وفين الزيتون فين الزيتون
لقاوها سايبة ،
خربوها ما بقات طبيعة
ما بقا فضاء
وفين بنادم
كلشي حشروه فعلبة ،
فين بوخريص ولوانو
روج وروزي وصهبا ،
ويغني "مالي تفوتيت بلحظك الفتاك"
أودي مالي فتنت
بحال الليف بحال البا ،
بحال الكرشة بحال شكانبة ،
باب مراح أكدال
حمرية وسيدي سعيد وتولال
والتولالي يغني على حمان الحربيطي
وحنا نصفقو ونعاودو السرابة
ونرددو الحربة ،
والبوخا محزم
غادي بتعريجة يدمدم
والمعلمة شامة
وباعوت بلا مكبر صوت
يحمق بغناه الفيلالي
لعيالات فلعراسات والليالي
بالقوافي مسرسبة ،
وكيلوميت سيس
كيلوميت ديس
نجيبو من المطارح لبيليكول
باش نديرو السينيما
نتفرجو نفوجو
الناس مساكن معذبة ،
والعودات بباب لارمود بمرابط الخيل
على النبوري شادات النوبة ،
والكسابة والفلاحة فصفوف مصافة ،
باش يحسنو الخلفة ،
وحنا نتعلمو بخفة
قواعد اللعبة ،
عرفنا ما عرفنا
ما كناش نعرفو الحبة ،
نقضيو باللي كان
وشيوخنا دايرين ليهم قبة ،
الاحترام والتقدير
والتحية المأدبة،
ويلا بان الخطار
نغبو غبة ،
نصيدو الطير
نطيبوه على الهدبة ،
وديما مرحبا
مرحبا والف مرحبا ،
الصدر مفتوح
والخير موجود
وما تضرب حسبة ،
ودابا
المقاتلة فلقهاوي على والو
والمضاربة ،
هادا براني هادا ولد البلاد
والصحاب مشاو
ما بقات صحبة ،
اللي مات مات
واللي باقي شغلاتو القفة
ولهاتو ظروفو القاسية الصعبة ،
ودارنا مخربة ،
مرسم الوالدين
تمنيت نبنيها طوبة طوبة ،
دابا لحباب غايبة ،
وليام الزوينة مشات
واللحظات اللي باقيا غادا هاربا ،
وهانا ها حنا كنرابيو
مع اللي رابا ،
بالدارجة المعربة ،
واضحة ومهذبة ،
ماشي لغة مخشبة ،
نرابيو مع اللي رابا
وعلاش لا
بوركوا با ؟
باقي نرجا
رابح التيجاني
والله ما نقطع
الأمل والرجا ،
ياك لخير ينفع
وقت ما جا ،
دابا تفجا
وتولي حجا
تعود البهجة
باقي نرجا
نرقى درجة
ورا درجة
فكتاب الله
كاينة الحجة ،
بعد الشدة فرج
ورخفة وخرجة ،
الغارق ينجى
يتعدا موجة
من بعد موجة ،
ولرياح الهوجا
ولبحور لهايجا
وينال ما رجا ،
وخا الدنيا
عميا وعرجا ،
رجتها رجة
روناتها الهجة
غادا دايخا وطاجة ،
فوسط مرجة
فطريق عوجة
لا راحة ولا ملجا ،
شيخة عماتها عجاجة
جارا كمنجة
وتابعا الفراجة
ولبهرجة ،
وبايعانا كلنا كورجة ،
وخا حظي ما جا
وخا النعجة
باقا نعجة
بلا قرون بلا نياب
وبلا حباب
باقا نعجة ،
وخا الحياة فجة
و يلا طابت
كتفوت الطياب
حتى تصبح خامجة ،
ويلا نسات وحلات
مرورتها حدجة ،
إنما يا سعد القانع
مصاب ومصاب
يضربوه بشفنجة ،
دنيا ويادنيا
شابت أحلامي وهيا
هيا
وانا فحروفها
باقي نتهجى،
بلسان تمتام
يحاول يفك الكلام
بكل ما الأرض من لهجة ،
عسى يدرك ما يدرك
قبل ما تفيض الروح
والمهجة ،
عيان وسخفان
ومتلفاني النهجة ،
قاجاني قجة ،
شلا ما بغيت
وما قضيت حتى حاجة ،
ويكون ما كان
أنا إنسان
مخلوق باش نرجا ،
باقي نرجا
نفسي فحاجة
ومحتاجة ،
ودابا تفجا
وتولي حجا
دابا تفجا
وتولي حجا.
كن بالفعل إنسان
رابح التيجاني
*عجيب أمر الإنسان
غريب حال الإنسان
من يوم كان
وهو حيران
ومفتون
ضايق بيه الكون
آلة للطغيان
والجنون
ما اهتدى بأديان
ولا احترم قانون
عجيب أمر الإنسان
غريب حال الإنسان .
*كان ف الجنة هاني
وختار العصيان
وكان نزولو للأرض عنوان
تاريخ مرير
ف التدمير
ف صراع الشر والخير
حروب بلا تبرير
وظلم الإنسان
لخوه الإنسان
ما كاين ميزان
الغني يجهل الفقيــر
والقوي يسحق الصغير
والمآسي والأحزان
رحلة ف التيه والمخاطر
بلا روح بلا مشاعر
وخداع المظاهر
سبـاق مع الزمان
وتشويه المكان
عبودية للشهوة والمجون
وحب المال والبنون
والجاه والسلطان
مالو الإنسان ؟؟
مالو الإنسان ؟؟
لا تهنى بحكمة لقمان
ولا كفاه مال قارون
عجيب أمر الإنسان
غريب حال الإنسان.
*خلقو الرحمان
ضعيـــف عريان
لكنو مجبول على النسيان
والجحود والنكران
والكذوب والبهتان
متكبر وكلو نقصان
ملهوف على ما غادي يكون
غرقان
ف الأطماع والديون
مكار بألف قناع
شعارو نفسي نفسي
ومن بعدي الطوفان
يا إنســــــــــان
عد لصوابك
شقاء لغير فيه عذابك
عش ف سلام وحب وأمان
جعل الناس كلهم حبابك
وشوف معجزات الأكوان
وعبد خالقها المنان
عش بروح فنـان
كن بالفعل إنسان
كن بالفعل إنسان
تكسب حسنات الدنيا والرضوان
تعيش ف الراحة والهنا
وتعطي لوجودك معنى
بلا نـدم بلا ألـم بلا خسران
واللي عمل الخير يلقاه
واللي عمل الشر يلقاه
بالحجة والبرهان
وعجيب أمر الإنسان
غريب حال الإنسان .
8 /شتنبر1996
الترامواي
رابح التيجاني
ســـالت بحـال الحنش
ســاهت بحـــال الريح
، زوين ما بحالوشاي
هاي هاي هاي
على ركبة
، ما نقولكشاي
غادي مفوج
مساري مفرج
وخا تعيا
، ما تعياشاي
واحدكان مع الناس داخلة
وهي وصلات للمحطة نازلة
بونجور يالغزالة
، ضحكات وردات باي باي
، بغى يدير بالناقص مايركبشاي
، وما قدرشاي
شكون يقدر يقاوم الترامواي
هاي هاي هاي
على ركبة
ما نقولكشاي،
بانوراما على يمينك وشمالك
والبشر غادي جاي،
واد بورقراق والفلايك والطبيعة
والقنطرة شـــامخة والمناظر رائعة
والرحلة هانية وسريعة
، والعذاب ديال كل نهار ما بقاشاي
ولينا كلاس
بحال الناس
بحال شلا مدينة وعاصمة
، وما نحصيشاي
سالت بحال الحنش
ساهت بحال الريح
، زوين ما بحالوشاي
والسكة مبلطة ومرشوشة
السكة مفروشة
بربيع خضرما يتقلعشاي،
تهنيـــــنا وارتاحينا
مع وليداتنا ووالدينا
نقولها بطاي طاي،
بلا زحام بلا خصام
بلا وقت ضايع
ما توقف ما تعاينشــــاي،
بلا دخان بلا قومان
هادا يطلب وداك ينهب
، وشي يبيع الديطاي
و سعاي تابع سعاي
وهذا يجري وهذا يضارب مع الكنبري
وهذا بغى يسيري
وبرهوش داير يدو فجيب مفشوش
، ومولاه ما عايقشاي
والناس عين ميكة
اللي بغا يموت يموت
، الروضة ما بعيدشاي
آش داني ولاش مشيت
، أنا كاع ما كاينشاي
البارح واحد البيراط
، قال لي نطلعو للرباط
، زعما نتفقدو أحوال النشاط
كنت عاكزنمشي على رجلي
، يحفالي السباط
نركب ف الطوبيس
الصهد والبرد والسربيس
، ومشاكل الوضو والاختلاط
دابا ما نعكزشاي
، كاين الطرومواي
سعــــــدي بالطرومواي
، هاهو جاي
وقف لما شافني بصوت حنين
ترين ترين
، ماكاين لا زيد دردك ولا راي
وركبنا
الله عليها ركبة
ما نقولكشاي،
وواحد بنتو ركبات وجلسات
وجبدات الستيلوات
وبغات تكتب الحب في خطر
، ما عاونهاشاي
قالها يابنتي هداي
، الحب ما ف خطرشاي
المواطنة هي اللي ف خطر
، ما تبسليشاي
هداي الله يرضي عليك هداي ،
، سلــوك الطوبيسات ما يتعاودشاي
كوني متحضرة
زعما راكي كتقراي
هدا ترامواي ديالنا من أجلنا
، وما كدبتشاي
دابا اللي بغا يقرا مزيان
ويخدم مزيان
الطريق سالكة
من كريمة للعرفان
للعكاري لحسان
، أرا وكان
غير ما نهدموشاي
الخير مع اللي يشوف بعيــــد
يدير الساس
يدعم بالسيما والحديد
، الخير ف يد البناي
نكونو يابنتي قدوة
المستقبل خطوة تابعاخطوة
بثقة وقوة
بشهامة ونخوة
نبدا ولا تبداي ؟؟
هاي هاي هاي
الله عليها ركبة ما نقولكشاي
شكون يقدر يقاوم الترامواي
ســـــــــالت بحال الحنش
ســــــــــاهت بحال الريح
.زويـــــــــن ما بحالوشاي
راس العام
رابح التيجاني
البارح ف المنام
خير وسلام
شفت راس العام
جاي من لحمام
كيتبختر
بالفرحة منور
وبالورود معطر
هاي هاي على الزين والسر
ما شاء الله والله أكبر
شفت راس العام
مغنبر
داير القب ولاباس اللثام
مبين شويا ومخبي شويا كيحير
تشوفو كيف تتشهاه
وتتمناه
ماشي كيف كيظهر
سرحت فعينيه غبت بلا ما نشعر
قال لي كلام
بلا كلام
يلا سمعو الحجر
يسكر
شهد مقطر
هاي هاي حيد بالاك
ها راس العام معاك
قالو لي الناس شور
كون تصبر
عطينا شبر
يوصل بعدا وهدر
وشعر
غني حتى للفجر
أنا خفت عليه يعثر
يتلف ما يجيش أو يرجع فين كان
وكيفاش ؟ نعيشو بلا زمان
أنا ما بغيتوش ينفر
يدير بالناقص يتقلق يكفر
يتغير
حرام عليكم حرام
والله يلا هادا منكر
أنا مشتاق هادا عام
توحشت السما والليل وحديث الغرام
نطفيو الشميعة ونبقاو ف الظلام
وناكلو الحلوا ونطيرو مع الحمام
والرقص والأغاني
يا سلام يا سلام
والتهاني والأماني
والمشاعر فايضة بالمعاني
حتى يزيد وسميه
آجي فوقتك وفرح بيه
اللي جا ف وقتو ما يتلام
كون عاقل وبعد لهيه
راس العام
يوم من الأيام
لا عافاكم عييت نستناه
يمكن السعد يجي معاه
يلقاني ونلقاه
أنا كنذوب ف هواه
خير وسلام
البارح ف المنام
شفت راس العام
مابانوليش رجليه
بديت نضحك عليه
قال الراس لراسو اللي قالك لا تقوليه
زيد ف طريقك سير وخليه
الله يلقيها ليه
اللي تشفا دابا يبليه
وعلاش عليا نضحك ونكركر
آش داني حتى المنامة تتبخر
ديما زربان طاير من المقلة تنفرفر
كون خليت الفيلم أفلام
إيــه راس العام
دازو شلا ريوس
ما كاين غير طحن الفلوس
وكول كول شرب شرب وبوس بوس
وأراك للمظهر
تبند وتعنكر
وسهر سهر
وحك جر
ودردك زيد دردك وأفوس أفوس
ما تبقاش زوين وخسر
تقلق وجعر
راس العام هادا سعر
وسف حتى تسخف
وعوم حتى تتلف
وجبد ونثر
الما مذهب ودخان زعر
أو دخان مزفت وكاس حشمان حمر
الله يعفو الله يستر
وغزالة شانتا وغزال مجرجر
وفولة مسوسة وفروج عور
والحركة دايرة والسوق عمر
شي كيقول لشي إيوا كون نسر
كيل وعبر
سمر على الحمامة سمر
حتى ترشق وتشعشع وتطيب وتخمر
وطير بيها يالشيباني طير بيها وبطر
ونحر
تعشى بيها وفطر
الحمام يلابرد يرجع مر
شي كيوصي شي تهلا وفوز وجقر
وكبر ف عينيك يلا بغيتي تكبر
وهادا كيقول لصاحبو رضا
الله يعطيك الرضا
لاتغامر
لا تحلم وتآمن بالقمر
وحدة ف يديك خير من عشرة ف الشجر
وعيش ودمر
ويلا سولوك واش انت حي نكر
وزيد نكر
ويلا قالو ميت نكر
عنداك تقر
وسير كود ف جنازتك تبع السطر
الحركة دايرة والسوق عمر
والدنيا غاديا ومعاها لعمر
موعدنا غدا ف القبر
وفقت من الأوهام
ما عرفت واش مشى العام
أو جا العام
ودعناه
أو استقبلناه
ربحناه أو ضيعناه
شيعنا هو أو حنا اللي شيعناه
صدرنا أو صدرناه
وشكون حنا ف الأول والأخر
وااااالو ريح كتصفر
شويا من منظر
زوين يبهر
وفجأة يغبر
ما يظهر
يتلاشى خيال بلا أثر
عام مشى وعام وانت عاين ونتاظر
اواش اليد ف الما بحال ف الجمر
القطار عمرو لا جا ويلا جا مايوقف
ويلا وقف بيه فيه يقلع بالخف
والايام زربانة تلفانة تفرق ما تلاقي
وانا غلباتني شواقي
"أراسي وما داز عليك وباقي"
راس الدرب والزناقي
راس السوق راس الحربة راس المحنة
راس الطنك راس الحانوت راس الفتنة
وراس قاصح سخون على خلاه يدور
وراس ما عرفنا راسو من ساسو
وراس بلا راس
راس عريان
وراس مريض
دواه فلييو والزعتر
راس الما وراس الجبل وراس البحر
راس البر
شحال ديال الريوس
دخنا وتلفنا
وتشابه علينا البقر
الله يستر
راس العام
منور
شي بغاه محمر
وشي مجمر
أو مبخر مفور
يشوطوه أو ياكلوه خضر
ما يهمنيش وانا إيه
راس العام لماليه
أنا ما عندي زهر
ما عرفت جيت للدنيا مبكر
أو متأخر
المهم جيت ولا بد نسافر
الموت والحيا قدر مقدر
تخلطات عليا لعوام
لكن أنا ف المنام
ألف خير وسلام
شفت راس العام
بستو
ف جبهتو
وزاوكت فيه
ضحك معايا حتى تسدو عينيه
وداتو الأحلام
بعيد بزاف لهيه
والرعشة بشفايفو كأنو تمتام
يتهجى حروف ما هياش كلام
ما هياش أنغام
صورة مضوية بالرضا والإبتسام
والأمل والخير لقدام
آش قال ليا وآش قلت ليه
هاداك سر
يناجيني ونناجيه
يوم بيوم وشهر بشهر
يفيقني كل فجر
نصبح عليه
ونهار يعيا اللـــه يهنيــــه
ما نفيقش
بلاش ولاش
نزيـــد ف نعاسي
ونهني راسي
وناسي
ندير التراب فراش
ما نتغطاش
وانا نقدر ؟
ما عنديش مع الحر
نشهد ونتوسد الحجر
ونبدا نتعلم نشخر
نشخر
نشخر
قليب عامر
رابح التيجاني
بعنا وشريـــنا وخدا العربون
وجــاي يقولي قليبو مسكون،
من وقتـــاش زعما
وكيفاش
وكيفاش
واش كــان كاريه
ولا مرهون،
ولا مرهون،
وعامر بــاش
بالكذوب والتيه
بالكذوب والتيه
أو الأشباح ولعفارت والجنــون،
كان عليه يقـولي سديــنا
الله يسهل
يكون لي ف العـون،
يكون لي ف العـون،
نقضي حاجة
نفـوز ف ضو بعدا
نفـوز ف ضو بعدا
قبل ما لحب يتقادا
يرجع بالبون،
يرجع بالبون،
نوفر كلامي وغرامي وسلامي
وبالناقص منو
آش غادي يكون،
آش غادي يكون،
ياك غنينا حتى عيينا
وملينا
وملينا
والقليب مسيكيـــن
مطعـــون،
مطعـــون،
وهو فين ؟
وعمرو داهــا فينا
وعمرو داهــا فينا
تلفنا الصوت والصورة واللون،
طبيــنـا
ما خلينا والو فجهدنا
ما خلينا والو فجهدنا
وف شرع الحب
الغـالي يهـون،
الغـالي يهـون،
لكن حتى لين صبري وشواقي
زايد ف حمــاقي ومفتون،
خلاني نترجى
نستنى ونتمنى
نستنى ونتمنى
لاحني ف الاحتيــــاط
مركون،
مركون،
يهنيني مرة
ويريحنى بكليـــمة
ويريحنى بكليـــمة
وكلامو ياســلام
، شعر موزون
، شعر موزون
وجمــالو ينسيني فمر فعالو
وحديــثو أنغام
جذاب ومتقون،
جذاب ومتقون،
ويشغلني حـال قلبي مسكين
هشيـش فاني
تقول كارطون،
تقول كارطون،
الدنيا غـــادا حقا بلا بيه
لكن معـاه
سعدي مضمون،
سعدي مضمون،
وحتى يلا كــان حبو أوهــام
الوهم معــاه
ضيـاع مأمون،
ضيـاع مأمون،
غــادي نبقى مسمر فعتابو
ندق بــابو
حتى يقول شكـون،
حتى يقول شكـون،
يلا كـان على الحب
نزيدو شويا
نزيدو شويا
أما الحبة
باركا عليه مليون،
باركا عليه مليون،
دوارة البقرة كاملة
بصولدي
بصولدي
وشـوف المشية ولهبرة ولعيون،
ونزيــدو ما بغا
رضينا بالزيادة
رضينا بالزيادة
ولات عـادة
والوقت ملعــون،
والوقت ملعــون،
اللي موجــودة هدية لحبيبي
ويلا حتاجينا
نغرقـــوها ديون،
نغرقـــوها ديون،
واللعب بلا حساب
غير يرطـاب
غير يرطـاب
البـانيول والبيسي وآي فــون،
يـاك تفاصلنا
وخدا العربون،
وخدا العربون،
ودابا تيقـولي قليبو مسكـون،
من وقتـــاش زعما
وكيفـاش
وكيفـاش
واش كـان كـاريه
ولا مرهون،
ولا مرهون،
وعـامر بـاش
بالكذوب والتيه
بالكذوب والتيه
أو خلاه للعفاريت والجنـون؟؟
شمكار
رابح التيجاني
غير بغيوني
راني زوين
ظريف وحنين
ومرضي الوالدين ،
ما تخافوش مني
أنا منكم
ما عندكوم عليا لين ،
وانا ديالكم وليكم
وفين تلقاو بحالي فين ،
وتهربو حتى تهربو
معاكم كل حين
وانتوما غاديين
ولا جايين ،
أنا فمكاني
حاضيكم من العين ،
الله يحفظكم من شر بنادم
كحل الراس
وينجيكم من ابليس اللعين ،
غير بغيوني
ودعيو اللي بلى يعفو
ويكون لي عوين ،
خليوني فحالي
راني مسكين
عايش بالدين
ومدان اليدين ،
واش انا اختاريت نكون
مرفوع ديما
بلا جنحين ،
الطبيب خرجلي الدوا لحمر
مزيان للدم الخاثر
وخا يكون مر
نحسبوه حلو وبنين ،
ووصاني نشربو بلا ما نسكر
بيه نتغدى بيه نتعشى بيه نفطر
وما نقربش للأسبرين ،
وما نكترش من الأدوية والفيتامين ،
باركا عليا القطعة
الحمص والزريعة
ديال الكرعة
ومرة مرة ويلا كان ممكن
السردين ،
ووصاني ما نجيش ونقطع النيكوتين ،
قالو مبوق وقالو مفلبي
كلام مزوق بالواضح والمخبي
وقالو
وقلنا آمين ،
وبكل تواضع أنا هو
بطل ديك النكتة الشهوة
ياك عارفينها ؟ أنا هو
مرة جاني واحد نخوة
يطلب ويرغب نبيعلو كلوة
جاوبتو شري مني
هنيوني
نتفاصلو ف الحين
على كلشي من الراس للرجلين ،
خود موتور وكاروسري ديه
ربح بيه
يبقالي غير منخاري متمسك بيه
نيفي الله يخليك خليه
أبدا ما نستغناش عليه
إلى يوم الدين ،
ياك أنا ظريف وحنين
ومرضي الوالدين ،
فكرت نقرا
نجيب حديدة حولية ومرا
صاطا زعرا
وديبلومات من برا
ولكن آش جا ما وصلني لفرنسا وكندا وأنكلترا
وأمريكا والصين ،
ودماغي حفا وتصدا
عامر بالعجين ،
وفكرت نعري على دراعي مدة
عريان عريان بالفايدة بعدا
نهزالفاس والبالة والعتلة والمقدا
خوكوم عظامو محلولين
وكتافو طايحين ،
وفكرت وفكرت
حتى وليت مفكر
مفكر نيت
وخا ما اعتارفوش بيا الحاسدين ،
والمفكرين العيانين ،
وزعما علاش
ياك كافي الناس شري
مظلوم وما جاريت الظالمين ،
وكلنا من الطين
وليه راجعين ،
إيوا غير بغيوني
راحنا متساويين
بحال الشمندر بحال الفلفلة
بحال الأفوكا بحال البصلة
ويكونو متناقضين
ياك ف الطبيعة متعايشين ،
قربو مني وسمعو اليقين
كنت بحالكم
قطيط سمين ،
هاني ودافي
سنين وسنين ،
والدنيا هكدا
غدارة ومكارة وحاقدة
ومنين جاها الأمان منين ،
غير بغيوني
المحبة خير ليا وليكم
وللناس كاملين ،
وراني زوين
ظريف وحنين
ومرضي الوالدين
أعبــــــــــــــــــــاد الله
رابح التيجاني
واحد أعباد الله شرف
وهرف
وخرف
، و تلف
ولا بغى يشد الأرض
ناوي يشعلها يقربلها طول وعرض
زهقلو الرتاج وفات حد المرض
راحتو واجبة على ناسو
، فرض
سب وقذف
وهدد وحلف
وغوت حتى سخف
البير غادي يجف
والدنيا غدا توقف
زعيم خارج الصف
، زاعم وعازم يبدا الزحف
، الله يستر والله يلطف
وحدو فريد فموالو
لكل يوم قوالو
ولكل حال حالو
وقناعو وتبدالو
واعر ف التلاوي واللف ،
، شعارو كان وما زال العنف
والعنف والعنف والعنف
راكم ما شفتو والو
، ويتجنن ويزعف
، ويخبط ويشتف
، ما عرق ما نشف
ويفكرنا ف موسوليني وإلتسين
والفلوجة وساحة تيان آن مين
ونسى إسراطين
ما خذا عبرة من السابقين
، لا قانون ولا عرف
الله أودي
ياك باب الحوار مفتوح للمظلوم
والشاكي والباكي
، وللي دعا بالضعف
وللي بغى يناقش
، وحتى اللي بغى يتفلسف
الله أودي
ياك الله كرم البلاد
وخيرو على العباد
نحمدوه ونشكروه كثر وزاد
، إيوا البترول بعناه وشرينا العلف
إيوا وفين الباقي
، فين مشى الصرف
وحنا ما ملزومينش بالسلف
ونزلعو الفلوس الصحاح فطرقان مشبوهة
، من طرف
وفين حق القومية
والروح الوحدوية
والأخوة العربـــية
وفين التضامن وفين العطف ؟
ولا ما كاين غير لهف
ونتف
وخطف ،
الله يستر والله يلطف
المسكين حمقو الولف
آش هادا : المظل والسقف
يشمخ باللسان والأنف
ويفرح بالدم ينـزف
ويبشر بالقصف والقصف
ويلا ما كفات مياوات
، نحسبو بالألف
الله يستر والله يلطف
كنا الواحد غير يرعف
يعتقوه الناس بالخف
شي يجيب القطن ولالكول
يداوي ويسعف
شي يتلفن ويهتف
وكان اللي غلب يعف
وكانت المحبة هي القوة
، تتحدى الحاجة و الظلم والخوف
لا
العالم وخا حشمان ومتفتف
حساسبي منافق ومقفقف
قال :هاد الحال ما يشرف
الهاوية عميقة
، والبلاد على الحرف
اللي بغا يدخل للتاريخ بالسيف
، يدخل ويطلع للرف
العالم ينادي: أعباد الله عتقوه
وعتقو الناس منو
اللي يعاير ولادو
بالقطوط والكلاب والفيران
ويطحنهم من كل جيه بالنيران
معـــــــــــتوه
راكبو جنو
غادي يهدها ويحرقها
ويطلع يندب فوقها
يدير ما دار نيرون
يعاود حماق شحال من مجنون
حتى تجيه الضربة زدف ،
وعلاش الإصرار والعناد
المهم خير البلاد والعباد
الانسان يلا خذا حقو
، يبوس وجه وظهر الكف
يحمد اللي خلقو
ورزقو
يتهلى ف اللي يستحقو
باركا عليه
يغمض عينيه
يرفع للسما يديه
. ويقول الله يخلف
مآسي الطرقان.. رابح التيجاني
بإسم البراءة والطفولة
والحق ف الحياة السعيدة،
بإسم الحب والضحايا
والأرواح الشهيدة،
نوضعو حد للنزيف
حتى غاية ماهي بعيدة،
السياقة فن من الفنون
احترام والتزام بالقانون
عمرها ماكانت وعمرها ماتكون
عياقة
ومراهقة
وتهور وجنون،
الطريق للأسف ساحة معركة
فيها الناس مرهقة ومنهكة
بسلوكنا وإهمالنا
نلقيو بنفوسنا
للتهلكة،
سيارات مهمولة
شاحنات مشلولة
حافلات معلولة،
واقع السير مرير
وشحال قد ينفع التدبير
والآفاق مجهولة
والمشكلة
المشكلة محلولة
يلا الناس كانت مسؤولة
بعقلها ومعقولة
السرعة ماشي بطولة
وهاد السيارة علاش معمولة
ياك للراحة وعيشة أكثر سهولة
للأسف
رجعناها أداة جريمة
نحس
باب للقبر للمشفى للحبس
ركب
وضرب
وهرب
وضرب
وهرب
وتهرب من الواجب ديما
تهرب
كلنا ف الطرقات
الصداع ولغوات
ومشروع مأساة
عفس
وقتل نفس
وزيد هم العاهات
وسير بلا ما تحس
ولاصورانص يخلص
الخطأ منا
والتساكن مابقاتلو قيمة
الأنانية طغات
ومعاملاتنا سقيمة
وضميرنا مات
للأسف
حشومة والله يلا حشومة.
ليست هناك تعليقات:
إرسال تعليق