هاي .. رابح التيجاني

هاي      

 التيجاني رابح 

هاي

وبعد هاي

هاي هاي

هانا تاني

هاي هاي

النخوة شهوة

   

والزين  دوا

غاية

آية

الكلمة والبسمة والنغمة

الهاي

الكلاس

هاي

لفوق ف السما

تقولها نجمة

ونجمة نيت نجمة

وقوليها وسهاي

وتشغلي وتلهاي

وماعنداك لاش تدهاي

ضحكي ولعبي وزهاي

معاك جات طلبي وتشهاي

وبزاف ما تتشهاي

وما تدهشي ماتفهاي

وآمري ونهاي

خليك ديما هاي

اللي عليا نصبح هاي

 ونمسي هاي

وديما هاي

ديما هاي

وبعد هاي

وهاي هاي

والهاي

بالسلامة . باي

وتهلاي

هاي سلام ترحيب. وهاي هاي للاعجاب .والهاي علو مكانة

أأأأأأأوف لاين

رابح التيجاني

أ ف أ ف  حتى لاين

هو مشغول وأوف لاين

سوا كاين ولا ماكاين

خيالو ماباين

ماباين

وأنت راس المحاين

  مكتوب عليك تساين

علاين تذوب علاين

حتى لاين

زعما يكون فاين

ومناين نمشيو ليه مناين

وإيمتى نشوفوه مرة  أون لاين

يطل

و النقيطة الخضرا تشعل

عراصي وجناين

نخرج ندخل

نخرج ندخل

وندور ف الركاين

نهبل

 ونبدا نتخيل 

وتشدني السخاين

ونعيش اللحظة  عام  عاماين

ياك أقلبي لاباس ياك

آش كاين

بحال يلا هواه داك 

 عاين باين

أكيد داك

خداك

جمالو

كلو

وقوالو وفعالو

مافيه شويا عايب أو شاين

حتى كذباتو حلال محلل

ويسأل أو ما يسأل

والو منو

مايتقدر بملاين

 والو يسوا

والو شهوة

والو ثروة

 واللحظة  عام ، لا، عاماين

إنما الزمان شحيح وخاين

ما فبالوش أنا كنعاين

وعييت

خزيت

وأأأأأأأأأف 

أ ف  حتى لاين

 وهو مخبي  وأوف لاين 

أأأأأأأأأأأأأأأأأأأأأأأوف لاين

                                                                     المضيق

waw .. رابح التيجاني

صحاب المليح

باعو وشراو

جمعو وطواو

ومشاو

ماخلاو

ف السوق غير اللي نساو

تفيفيحات وخويخات ومشيميشات لواو

وسريدينات بصهدالشمس تشواو

وقطيطات تبحو بالرغيب مياو مياو

جينا  بعد ماالناس قضاو

ونضاو

قلة شي

و الفرشي

والديشي

ماكاين مانتشهاو

وهكداك الشناقة قواو

وقال ليك تعالاو

تعالاو

فين ووقتاش

وشلا  وعلى ياش  

العقود رشاو

 والوعودبلاو

والنقشات حفاو

ظهر العيب

والغشاشا تعراو

قالك  سمعو ورواو

يلا بغيتو تتهناو

نتهناو ! ؟

نحمدوه ونشكروه 

الدنيا بخير

وخا خيراتها غلاو

آش قضاو

اللي شكاو وبكاو

ماماتو ماحياو

وبقيت نشوف البهتان

الحيتان

لهفو البحر وكيتباكاو

واللي قصدناهم خواو

الدموع ف عيني دواو

منتهى الإحباط

دوخاتني أوهامي

 لوكان بقاو

غير شويا

 لحظة 

 لوكان تسناو

نديو باش نتلهاو

بلا شروط

بلا فشوش

نقنعو بالموجود  ونرضاو

نقنعو ؟

ياه

آش هادا ؟ جات !؟

ف لحطة شرقات

ماشي دق المفاجآت

ماشاء الله

واو

ماشاء الله

واو

شكون قال تبان

حتى قطعنا لياس 

ومشاعرنا طفاو

قرطاسة جابتني كاو

واك واك أعباد الله

العداو

عتقو مابقا من الروح

 وزربو
لا تبطاو

دخلت للسوق 

سوق راسي

وعظامي تبورشو 

أفكاري تشوشو

وبداو يتلواو

شعلات الشهوة ف كياني

أجمل ماكاين

والناس ماشافو ماراو

غزالة

راس السوق

الطوب الكلاس

قدامها النجمات مايبانو

والو مايسواو

عيينا نحلمو ونتمناو

ونبردو

ونحلمو وندفاو

رجعات الروح 

دابا أييه ننساو 

نعيشو مايهمناش

سوا صحاب المليح مشاو

أو جاو

مايهمناش

واو

ماشفتوهاش؟

أكيد أكيد

ما شفتوهاش

آية سبحان الله

نحمدوه ونشكروه

ماشاء الله

واو واو

واااااااو

 عجــــــــــوبة 

رابح التيجاني

   

عجوبة أمرك

وبــــاز على  صبرك

سخيتـــي  بـعمرك  

يضيــــع فــانتظاري

عييــــــتي بشعرك  

وما فــــــاد  سحرك

وخــــــــانك   زهرك  

وتـــكتم و تــــداري 

يلا عـــــــارف قدرك  

خلـــي ما يـــــضرك

وكفيـــــــــــني شرك  

هذا  لعب الـــدراري

حتى ليــــــن نخبرك

ما يهمنيـــش عذرك

سير عـــوم  فبحرك

مســــاري مساري

الأوهــــــــام خمرك

فـــسكــاتك وجهرك

ويلا غــرامي جمرك

إيـــــــــاك  من ناري

عـــانيـــت من غدرك

وظلمــك وقهــــــرك

وغــرورك وجـــــورك

وتــــــزاوك فـــعاري

لما غـــــــاب بـــدرك  

وما جــــاش فـــجرك

ولمحبــــــوب هجرك

رجعتي  لبــاب داري

كــــــلك مـــــــفبرك

طيـــــــــبتك وطهرك

وبـــــــردك و حــــرك

اصطنـاعي وتجــاري

نـــــــاشط ومـــحرك

وتفعل وتـــــــــــترك

فـــــــــــــايق ومورك

وفـــــــــــاهم وقاري

وعـــــــــايش عصرك

يغـــــــازلك ويسهرك

ويضحك لك  ويــــهرك

ويرقص لك عــــــاري

الحال زيــــــن يسرك

فتــــــــــــــان ويغرك

وممكن يـــــــــدمرك

حـــــــــذاري حذاري

شيطــــــــانك غيرك

زيغك ودســــــــــرك

بخر ليــــــك وعطرك

وجننتـــــــيه أنـــاري

وبعد مـــــــــــا وقرك

سكرتــــــــــيه بمرك

ولبستيـــــــه بمكرك

البردعـــة والشواري

نـــــدم حتى شكرك

كبـر  بيــــك و هدرك

ولى  يخــــاف يذكرك

تـــالف يــدور ويراري

نمـــــــوت ونـــفكرك  

فــــــــمدك وجـــزرك

حتى يضيـق صـــدرك

ويعــــود لي اعتباري 

تمشي على خاطرك  

والألــم عــــــــاصرك

وعيــني على ظهرك

ونفرح بـــــــــــنهاري

ضميـــــــــــرك يجرك 

يحفر لــــــــــك قبرك 

يغطيـــــــك ويسترك

تغيــــب على نظاري

واللــــــــه يلا سرك  

مصـــــــاب غير تدرك

لي ما عرفك خسرك

بــــــايع  ولا شـــاري

  حميمة ..

 رابح التيجاني  

حميمة بيضا مرقطة بالنمش

بعقلها

ماكتلعبش،

ختارت راسي

رجعاتو ورش

دارت فوقو عش،

سكناتو

روناتو 

عمراتو

بالقجاقل والقلالش والقش،

 وكتبات بريشها ف عتابو

 بمنيقرها ف جنابو

النهار الاول يموت المش،

وانا ماندويش 

وعما وطرش ،

أنا مامسوقش ،

قتلاتني

جامعا كل الفنون

قاريا أسرار الفتون

وصافيا

حرة

مافيهاغش،

عاجبها حالها

واللي غضب

خليه

غدا بوحدو دابا يتفش،

محتاجة وما تطلبش

باغية وما ترغبش،

 

رزينة هادية

وبسيطة عادية

وما تهدرش،

ويلادوات تهمس وتوشوش،

وما تكترش

غايبة وحاضرة

وظلها كاين وماكاينش،

وماتنش

وماتهش،

شعارها عنداك وبلاك

وإياك

وحربش،

هبش

تجبد حنش،

وانا عشاق ذواق

غلاق

كبير الكرش،

أنا أناني

و مفشش،

القليب مسيكين ضعيف فاني

و هش،

اللي شافها ديالو

يجيبها يجيبها

مايصبرش،

يموت ف الزين 

وماتغلبو لاعياقة ولا وش،

وينسى زعما

أبدا مايقدرش،

الحميمة كبرات وزيانت

الوشام والطاطو

والحنة والنقش،

والشوفة حلات وقصاحت

والكلام رجع حرش،

يمارات السر بانت

وانا عقلي تشوش،

وليت نتلف قدامها

نتبورش نرتعش،

فاينها الحميمة

والوريدات كتسقى وتترش،

كان هديلها ينعش،

ولما تهز عينيها ترمش،

تفرفر هربانة 

تقولها غشيمة

تتردد و تدهش،

ترمش ترمش ،

بحال يلاخايفة تشوف

أو خرج عليها وحش،

دابا الوحش تيقول للوحش،

تكمش آهيا تكمش

اقنع وقول اللهم العمش

 

وتحقق بعدا  ورمش رمش

واش الحميمة المرقطة بالنمش،

مجرد خيالات؟

موجودة فعلا  فعلا ؟

وتوجدات؟

،قلب قلبك وروحك والوجدان

فتش،

واش عمرها طارت  وعلات؟

وجات حتى لعندك  وسكنات؟

تأكد  تأكد  مزيان

و أصلا  أصلا

واش كاين  أو  كان

فوق راسك عش ؟؟

هي بعقلها

ماكتلعبش 

   ياك لابـــــــــاس !!؟     
 رابح التيجاني 

 حتى رضيتي

   وقلنا بغيتي  ،

وكنتي جاية

  وعاود لويتي،

ياك لاباس

  آش نسيتي!!

 أو خلاص راك عييتي ؟؟

 انتظرتي بزاف ومليتي؟؟

وكيف كنتي

وكيف وليتي !!

شايفة حالك غلطانة

تسرعتي وتلاحيتي !!

ومن بعد ما عليتي

 من سماك نزلتي

   تهديتي !!

انهزمتي تحطمتي

ساليتي و انتهيتي !!

واقفة خايفة ندمانة

باغية تزيدي وما قديتي،

مابانت ليك طريق

أو تعاميتي،

مالك كنتي ف غيبوبة

وعاد حييتي ؟

دغيا سخيتي

وهدمتي ما بنيتي

وسمحتي ومحيتي

وجمعتي وطويتي 

ياك ما كنتي عيانة

وعاد بريتي ،

كنتي وقيلا كتيكيتة

باقي ما رويتي؟؟

أو يمكن نعسانة

  ويالله صحيتي،

مالك مرعوبة

ننساتك الأحلام ونسيتي،

زعما اتفقنا

وبديت وبديتي،

نويت ما نويت 

 وحتى انت نويتي ،

ودويت ودويتي

 وشكيت وبكيتي،
وتقتي بيا 

واطمائنتي،

وضحكتي ليا 

وغنيتي،

درتيني خيك

 وانت ختيتي،

نبنيو عشيشنا 

 غير بالتي،

علاش مشيتي 

،يمكن شكيتي

خفتي مني

 وتنويتي ،

ظنيتي بيا 

  ماظنيتي،

وانا ما غويت  

  ولا نتي غويتي،

حاشا اللي بينا

    كيف قريتي ، 

غدا نفرحو

 باللي حبيتي،

إن شاء الله

 وما تمنيتي،

را نتي فقلبي

،قبل من بيتي

 إيوا تهنيتي ؟

                                بــــــــــــــــــــــزاف ..

رابح التيجاني

واااااااااااابزاف عليا

أمـــولاي رفق بيا

ولطف يا لطيــــف

 راااالفرحة  قـــوية

جـــاتني   بلا نوية

والقلب   ضعيـــف

  

وانا  مجنون  شويا

لا    أكثر من شويا

وعقلي خفيـــــف

 يكــــــــفي أغنية

أو بســــمة وردية

ترجعني رهيــــف

 وضحكاااات لالا ليا

داتني كلي بما ليا

بخاطري وبالسيف

واااااابـــزاف  عليا

أمـــولاي  رفق بيا

ولطف  يا لطيــــف

واللــــــــه يلا هيا

وحـــدا فهاد الدنيا

والباقي تخريــــف

غزاااااااالة ومغرية

ولذيـــــذة وشهية

وحبها  عفيـــــــف

طااااااااهرة  ونقية

وأغـــــــلى هدية

ومقامها شريــــف

  

واااااابـــزاف  عليا

أمــــولاي رفق بيا

ولطف يا لطيـــــف

 راااااااالفرحة قوية

جـــــاتني بلا نوية

والقلب  ضعيــــف

 مــا نصبـــرش ثانيا

أو نفـــــــــــكر فيا

شعوري عنيـــــف

انا  مجنــون   شويا

لا     أكثر من شويا

وعقلي خفيــــــف

  نديـــــــــــــــــــــها ف راسي ..

 رابح التيجاني

أنــا قطعت يـــــاسي

خذيت قرار قـــــاسي

ننساه يلا نـــــــاسي

ويعـــذرني يانـــــــاس

قال ليــــك  رومانسي

وطبعـــــــــو  فرنسي 

ومعجب بنــــــــانسي 

والليـــــــالي و لعراس

القلب ديبلومــــــاسي

وعقلو سيـــــــــاسي

وزينو   يهد الـــرواسي

والشــــــــوفة قرطاس

وماهموش إحساسي

وهبـــالي ووسواسي

وحزاني وتعبــــــاسي

شاغلني بلا قيـــــاس

و يلا رشقلـــو  يواسي

و جا شرب من كـاسي

يفكرني بنحــــــــاسي

وهو الذهب والمــــاس

خاص نديـــها ف راسي 

فحالتي ولبـــــــــاسي

وفياقي ونعــــــــاسي

لاين غـادي؟ للإفلاس؟

عـــــــــــاجبو تهراسي

وتقطــــــــــاع أنفاسي

وهو مالـو؟ يـزيد باسي

نمــــــوت. ماكاين باس

وعلاش  مصدع راسي؟

نوقف على ســـــاسي

وخا القلب يقــــــــاسي

ولفراق خناجر ومــــاس

صافي قطعت يـــــاسي

خذيت قرار قـــــــــاسي

ننساه يلا نـــــــــــاسي

وعــذروني يانــــــــــاس

 مـــــــــــــوال .. 
 رابح التيجاني  

يمكن نجمة

تنزل من السما

تغمزني زعما

وما تحركنيش

ونعطش ديما

ويحضر الما

ويبقى تما

مايهيجنيش

وتشرق بسمة

 فقلب الظلمة

نــــور ونغمة

وما تغرينيش

وماشي بعيـــد

ف نهار العيد

كلشي سعيد

وانا ماسوقيش

ويمكن الأحلام

تفيق من المنام

فيوم من ليام

وما تفيقنيش

تصبح حقيقة

ف أقل من دقيقة

وما تبهرنيش  

وماشي غريب نعيش

عمري كلو يا حياتي

 ولو السعد يواتي

 حتى شي ما يفرحنيش

لكن  أبدا ، ومحــــــــــال

تكوني حدايا ، جنبي

وما نغنيش للدنيا

أفراح اللقيا

ونعطر الفضا

بالسعادة والرضا

ونعانق الكون

بلهفة وجنون

 نمـــــــــــــــول مــوال

بأعماقي ، من قلبي

تحية للجمــــــــــــال

واعتزاز بـحـبـي

 الشهـــــــادة للـــــــه

رابح التيــــــــــجاني      

  

  الشهــــــــــــادة للــــــه
 رابح التيجاني                                              

    الشهادة لله 
ومـــا بغيــــــنا والـو         

الزيــــــــن وحــدو خــــذاه

    وقـــــــال ليـك ديــالو               

مــــــا خـــــلاشي لســـواه

  غير شويا  بقـــــــــالو          

والحق يا نـــاس معـــــــاه

    فيــــــن تلقى بحـــالو            

 وزعما حتى يلا تــــــــــاه

       ما عندك ما تســـــالو              

 قمر  ضـوا سمـــــــــــــاه

          والنجــــــــوم ذبـــــالو                

 وشحــــــــــــال حلـوة الآه

يلا كـــانت مـــــــــــــــــوالو                

  نعمة مـــن مـــــــــــــولاه

     وفضل مـن فضــــالو          

  سبحان ربي عطـــــــــــاه

   وهــــاب جل جــــلالو      

  هو خلقــــــو وبغــــــــــــاه

      يكــــون زيـــــن مثالو        

  العين شــــــــــــــايقة تراه

      تقرا سرار جمـــــــالو        

 والقلب تــــــــــــالف فهواه

  وفرحـــــان بهبــــــالو     

 والعقل غــــــــــــادي وراه

      هــايم ماعرف مـــالو          

بروحنـــــا حبيــنـــــــــــاه

    وعشقنــــا دلالـــــــــــو      

    نشــــــــوف سر بهــاه                                               

    ندعي ونتمنـــــــالو   

     غــــزال ومدحنـــــــــاه

    وكتبنــا و قلنــــــــالو       

     لكن مـــــاشي معنــاه                                                  

الطمع  جــــــــابنــالو  

                         خليــــــــــه تيهـــو داه                   

أنا فقلبي خيــــــــــالو 

                          يكفي منو رضــــــــاه                   

يلا صعاب وصــــالو 

      الشهـــــــادة  للــــــــه

 وما بغينا وااااااااااالو  

مامفاكشاي

رابح التيجاني

إياك
كوني على بال وماتغفلشاي

الشي يلا زاد على حدو
مايعجبشاي

ريحي ضميرك ورضيه
تتهناي

سمعيني وصغاي
وفهميني ورواي

ماشي لخاطرك تبغيني
تحبي أو ماتحبيشاي

بالسيف عليك محبوبة
القلوب يلا مالت
نتي ماسوقكشاي

وديالك شي؟
ماديالكشاي

هي أمانة تضيع 
 ساعة تشيـــــــــخ 
تموت 
يلا مارقصاتشاي

خليك معصبة 
مخشبة
حتى تلواي
حتى ترشاي
وتفناي

وتقولي ماعشتيشاي


القلب يلاكان حديدا
غدا تتغبر تتصدا
تتلاح ف لافيراي

أنا شايف الشوق ف عينيك
مابغا يسكتشاي

سامعو على نار اللهفة غلاي
والمحبة باينة ماتخفاشاي

مالك خطواتك محسوبة
مالك خايفة و مرعوبة
من الماضي والحاضر
واللي جاي

تابعاك الإيف بي آي؟

فاض عليك الوقت
وكتتسلاي
وتلعبي وتتـــــــفلاي

حقي فيك مانفوتوشاي

الحب حق
وانا ماباغي غير الحق
 حقي أبدا  مايزهــــــــقــــــشاي

ومامفاكشاي
مامفاكشاي

مامعاتقشاي

واعتابريه واجب عليا
حرام نشوف الجمال
ومانبايعشاي
زعما واعية ولبيبة
وفاهمة 
وخا تحاولي ماتفهمشاي

تهلاي الله يهديك
وتهلاي

وإلا ملقانا ف جنيف
ونيويورك
ولاهاي

ورانا ماساهلشاي

معدباني
وانا إنسان
جالياني مطوفاني
ومليت التيهان
ظالماني قاهراني
وباريا مني ماشي هنا
 مـــــاكايناشاي

ماراعيتي قوانين
ولا أعراف ولا أديان
ولا شعور ولا وجدان
هادا منكر هدا طغيان
بلعاني و بالعلالي وطاي طاي

مسلطا عليا بهاك
هكداك
غالباني وما عفيتشاي

الجمال قتال يالعزيزة
مصيبة يلا زاد نغيزة
وهاي هاي

والزين طبعو فتان
وعلى ود هاد الشي
كاين الحنان
روفي شويا سخاي

تواضعي ، تعلاي

ويلا عجبك حالك
ومابغيتي تنداي

طلعي للجبل وبقاي
حتى تعياي

ولما تعياي

آجيني
 نزلي على خاطرك
تتهداي

أكيد
 غادي تجيني
ولو ماتبغيشاي

تقولي لي
هانا أمولاي

ولاش عليك
ماتحشميشاي

هكدا تعرفي معنى الحب
تدركي قيمتو
وخا انقرض مابقاشاي

وف السوق ماعبرو حد
كسد
ماسواشاي

غادي نرحب بيك وباللقيا
ونفتح معاك بيبان الدنيا
لكن نخليك شويا
غير شويا
ف الشمس تتقلاي

باش ماتعاوديشاي
ماتعاوديشاي.

فكيها

رابح التيجاني

أوكي

أوكي 

أرجوك ضحكي

عافاك  ضحكي

فكي التغوبيشة فكي

فكي  التعبيسة فكى

خلي شقايق النعمــان تحكي

تـــكـــاي على قلبي   ووركي

دكي ضلـــــــــــــــوعي دكا دكا

دكي

ويلا  غلبك البكا

خلي الليــــــــل 

ف شعرك يبكي 

ويــــــكفي النظرة

ف العيون تشكي

معاك الحق

أوكي أوكي

من دار الذنب

يستاهل العقوبة 

ياكي

تجاوزي  تعامــــاي

ميكي شويا  ميكي

عــــــدي و سلكي

خوفي ماعندو معنى 

وسواسي وشــــكي 

أنـــــا غلطان

ديما غضبان

وقاصح سلوكي

أرجوك ضحكي

عافاك  ضحكي

يلا كنتي ليا 

الدنيا ملكي

ماكاين باس

الحق  معاك

ونتي غزالة إفولكي

خليك مبشورة تمالكي

تماسكي

واستهلكي  الأيام

بنشوة بشهوة بنخوة

استهلكي

قبل ماتهلكيني وتتهلكي

شوفي فيا 

ارتبطي بيا

بالسلكي واللاسلكي

مالكي آش واقع مالكي

فكي خلاص فكي

حقك عليا

أوكي

أوكي

ولــــــوجيات .. رابح التيجاني

الصباح صباح

يلا صبحات

والمسا مسا

يلا مسات

وقمة الهناوات

يلا ضحكات

العيون بحور

والشعور غابات

والحديث أغنيات

والقد مقدود

روعة ، آيات

القلب  باقات

والهمس نايات

وهي الحب

إذا حبات

ومعانيه

منها شرقات

أسرارو

فيها تجلات

وهي رقص الثواني والساعات

روحها عانقات وضمات

سحر الكون والكائنات

للفرح غنات

وبالأمل ضوات

لكن المعقول عندها

نكات

ههه!

دابا الدنيا تغيرات

الأمور بالدراسات 

نظرة لبعيد وتاكتيكات

قالك العشق نزوات

خليه مغمض

تابو من التابوهات

وماتقبل أوامر..

ولا طلبات

وعاجبها حالها

وحالها حالات

مغرورة

مشغولة

نعسانة عيانة 

نسات

ماسوقهاش

وهي إيه

طلعات ولا هبطات

ويلا عولات

على خزيت ونوات

قفارت وخلات

ينجينا وينجيكم من الآفات

والهفوات

والايمان بالخرافات

ينجيكم من أنا أنا

وديالي ديالي

والنرجسيات

وعشق الذات

دابا فرات

أراك للإعترافات

حب الغير ف القلوب مات

وفعل الخير مناسبات

استثناءات 

والعواطف حسابات

الله معانا ف كل الأوقات

يثبت لينا الخطوات

وطريق السلامة

ولو دارت ولوات

ملعونة الشهوات 

منحوسة البليات

ماوراها غير الآهات

والأسف والصداع والغوات

أييه 

الحب تمشكل

والزمان تبدل

والمشاعر مسخات

الشوفات اختراقات

والبسمات مصيدات 

والكلمات

مجرد مفردات

ياك الطيبون للطيبات

إيوا

علاش القلوب قسات

لا ثقة لامودة 

علاش القلوب جفات

نفرات

يلا عولات..

على خزيت ونوات

قفارت وخلات

يديرها الجمال

الغزال غزال

والباقي حشرات

وف أفضل الحالات

هي ف أحسن تقويم 

وحنا من ذوي العاهات

رغباتنا تفاهات

مبالغات

وإمتى يقولولها 

من حق الانسان

كيف ما كان

يوفرولو ولوجيات

يديرو تسهيلات

وطريق للسماوات

يواطيو دريجات

يرطبو الممرات

ويزولو العقبات 

يكثرو الاشارات

والتلميحات

والتصريحات

يفكرو بالغوات

يهدرو السكات

يراعيو المستويات

ويفسرو المبهمات

والواضحات

عل وعسى تتيسر العلاقات

والتواصل واللقاءات

المرغوب والغايات

والأحلام والأمنيات

تصفا النيــات 

وتزيان الحياة 

رتــــــــــــــــــــابة

 رابح التيجاني 

 الــقليب    كـــــافح

 ودار    جـــــــوانح

 حلق ف سمـــــــاك

 وتخبا ف عيـنيـــك

 عـــــــرفك  واضـح 

                                            اليـوم   والبــــارح

 قــرب  حــــــــــداك

وغـنى ليـــــــــــــك

 آمــــــــــن   بهواك

 وتولع   بيـــــــــــك

  إنما  نتا قــــــاصح

  صــدودك جـــــارح

 ومصيري معــــــاك

 أمـــلي  فيــــــــــــك

 مالكني بهـــــــــــاك

 مبهـــور ناجيـــــــك

 حررني عفــــــــــاك

 هنيـــــــني نهنيــــك

 حبك  هــــــــــــــلاك

 ماقدرت عليــــــــــك

 خليـــــــــك  فسمـاك

  تيـــــه   ولا عليــك 

 مقـــــام    الـــــصبا

 فوجداني  نـــــــايح

 طوير ف غــــــــابة

 غـــــــادي   ورايح 

 عيــــا    بالرتــــابة

 يــنـادي    صــــايح

 ارجع لــــي     دابا

  اللــــــه    يسامح

 يا شبيه الـــــسراب

 ياترى  انت فيـــــن

 فنــــاني  الـــــعذاب

 وغـلبني  الحنيــــن

 غيـاب  بلا سبــــاب

 ديـما  متباعديــــــن

 وفـ  عــــز الشبـــاب

 تايـهين   يائسيــــن

 يــــــاك كنـــا  تـوام

 القلب على  الـــقلب

 مثـــال  الإنسجــــام

 قــــــمة ف الـــــحب

 ما نويتو  أوهــــــام

 بســـــــرعة   تغرب

 ويكـــــون   الختــام

 فــــراقنا   الــصعب

 بــــان  المستــــــور

 وزال  القنـــــــــــاع

 ذبــــــــال  النــــــور

 فلــــــــــحظة  وداع

 قـــدر   مقـــــــــدور

 رمانا   للضيــــــاع 

 وزمان   الســــرور 

 طــواه  الخـــــــداع  

 حبيــــــــــــتك   أنا

 بشـــــوق   ورغبة

 حـــــــالم    بالسنا

 ودنـــــيا    المحبة

 وخسارة   اليـــوم

 خمــــــدات  اللهفة

 الــقلب مصـــــدوم

 بالـفراق  والـــجفا

 فيـــــــــن الأحــلام

 وهمس   العــيـون

 وحــــلاوة   الكلام

 والعشق  المجنون

 بـــالي   مهمــــوم

 مكـــدر  مـــا صفا

 وحزني  مكـتـــوم

 فيــــنو   الــــــوفا

ما باقي قد مافات 

رابح التيجاني

ما باقي قد مافات 

الروح عيات

والذات فنات 

من بعد ساعة

ويمكن ساعات

ونقولو شهور 

وحتى سنوات 

جات أو ما جات

لا

عمرها لميعادها ماخطات

ماباقي قد ما فات

هادي هي الحياة

ميلاد وممات 

مجرد أوقات

يلا بدات

لما تبدا

نحسبوها سالات

وانا قدري الانتظار 

وخا عارف قطاري فات 

ندير اللي عليا

بالنية

هي الأعمال بالنيات

نعاين ونزيد نعاين

حتى تجي يلا هي بغات 

هاي هاي

وهيهات هيهات

هي مامعاها حيلات

وما كتتحمل بسالات

أكيد عينيها فيا

ومنيشة عليا

وواصلة دابا شويا

وربما راها وصلات

جات حتى لعندي

وخداتني ومشات

هذا شعوري زعما

أو غير تهيؤات

فين أنا

هناك أو هنا 

داخت بيا المتاهات

نقول مع نفسي عايش

ونقول عليا مسكين مات

يمكن مازال ف القلب دقات

بها الذات رقصات

وغنات أغنيات

نسات وتناسات 

المصير والنهايات

لكن روحي من زمان تهدات

 تقاضات

وبكاو عليها وتدفنات.

رابح التيجاني

مكسور الجناح

 رابح التيجاني

كمل مـــــــــــــــعروفك      

مــاتشوفني  مانشوفك

باغي نرتـــــــاح

نعــــــــاين حتى  ليـــن

شهـــــور أو سنيـــــــن

ما باين صبـــاح

عـــــــــــــارف ظـروفك 

وأسبــــــــاب خــــوفك

غلبـــاتك بـصاح

ونتـــا بيــــــــن وبيـــن

غريــــــب التكويـــــــن

ترطاب وتقصاح

مليـــــــــــــت  عزوفك

وعصبني  وقــــــــوفك

مكسـور لجناح

ملهــــــــوف وحزيــــن 

مشتــــاق بلا حنيـــــن

ويقيــــنك مزاح

كمل  مــــــــــــعروفك 

مــاتشوفني مانشوفك

هــالعار تــــلاح

أنت حر .. رابح التيجاني

شهوة مول المظل

ف الشمس يتسركل

أو ف الظل

يتعكل

 يعكل 

ونتا الحق معاك

ونتا مول العقل

فكر بسرعة  و فصل

حيي أو قتل

بيديك الشوار

والأمر والقرار

والعقد والحل

دير مايرضيك

نتا وما حلاليك 

كلك عسل 

واللي باقي يثيق

تعدا لبهل 

عمل مابغيتي عمل

قطع السناسل

فك اللجام وجفل

كل مايجي منك

بسيط وسهل

لطف منك وفضل

ختم هاد المأساة

بالقول

وبالفعل

وظلم أو عدل

نرتاح منك ترتاح مني 

مابقاش يهمني

مشكل ولاحل

نتا ديما معكس  قفل

كتقلب على جوا منجل

طلع او نزل

وآجي أو ارحل 

وغبر أو طل

شهوة مول المظل 

نسى أو سول

قلبي معاك فشل

تبهدل

عياه الاحباط  ومل

قربت نهبل

حبك ف شي شكل

ماعندو راس ولا رجل

بطاطا بالرطل 

ونواح وجراح  وذل

بالناقص منو أفضل

أحسن نرمي الحمل

نتهنى نلوح الثقل

صافي قررت نتسل

باش غدا مانوحل 

نتفك دابا منك 

دابا قبل مانحصل 

قلتهالك من قبل 

وبلا مانطول 

حالك تبدل

كثير على الأول 

ختم الحكاية وكمل

ويلا عزمتي توكل

و يكفي  ماتمثل

تتوجع وتتوسل

وتبرر وتعلل

وتهدد وتولول

ماباقي ماتغزل

وتنسج وتفتل

سكت شويا وصقل

وهتم أو اهمل 

ورفض أو قبل

وطفا أو شعل

وصبر أو جهل

وكبر شاني  أو قلل

وحرم وحلل

وكبر وهلل

بات كتهلل

وزيد قيل

وثقل ثقل

جتى تبسل

وغني وتغزل

وتعزز وتدلل

تمرح وتكسل

روف أو بخل

بان المقصود

بلا ماتعول

زرب أو تعطل 

عمرك ماتوصل

وإياك تغفل

جا دورك  استحمل

قاسي شويا وبالمهل

وتخيل ماعانيت تخيل

رمز الصبر كان جمل

دابا  تغلغل

تهد تخلخل

تخيل 

غوص ف عماقك وتوغل

قرب لباب قلبك ودخل

وتأمل

تأمل 

شموخ النخل

ورسوخ الجبل

وصمود النمل

وجود النحل

نتا مول العقل

دماغ العصفور

والكسدة بغل

ونتا مول المظل 

سير ف الشمس

أو سير ف الظل